Golovkınniń Mýrataǵa tartý etken shapany mýzeıge qoıyldy

ASTANA. QazAqparat – Áleýmettik jelide boksshy Gennadıı Golovkınniń jekpe-jekten keıin japondyq qarsylasy Rıota Mýrataǵa japqan shapanynyń jańa sýretteri paıda boldy, dep habarlaıdy QazAqparat Sports.kz saıtyna silteme jasap.

Qazaqtyń ulttyq oıý-órnegimen kómkerilgen shapan Japonııadaǵy Rıota Mýratanyń áýesqoı jáne kásipqoı bokstegi jetistikterine arnalǵan ekspozıtsııalar zalyna qoıylǵan. Ol Mýratanyń 2012 jylǵy Olımpıadada alǵan altyn medali men boksshy WBA nusqasy boıynsha ıelik etken belbeýdiń janyna ornalastyrylypty.

Eske salsaq, 9 sáýir kúni Gennadıı Golovkın (41-1-1, 36 KO) Japonııanyń Saıtama qalasynda ótken kásipqoı boks keshinde sharshy alań ıesi Rıota Mýratany (16-2, 13 KO) 9 raýndta nokaýtqa jibergen edi. Golovkın bul jeńisiniń arqasynda WBA Super, IBF jáne IBO nusqalary boıynsha chempıondyq tıtýldardyń ıesi atandy.

Jekpe-jekten keıin GGG japondyq qarsylasy Rıota Mýrataǵa shapanyn tartý etti, ol buryn eshbir qarsylasyna mundaı qurmet kórsetpegen. Chempıon buǵan deıin ár jekpe-jekke osy shapanyn kıip shyǵatyn edi.

«Mýrata júzi jyly, jymıyp júredi. Oǵan degen jaqyndyqty sezindim jáne men ony qatty qurmetteımin. Men ony keremet chempıon dep esepteımin. Shapan – qazaqtyń ulttyq kıimi. Ony eń qurmetti adamǵa jabatyn dástúr bar. Sol sebepti, ony Mýrataǵa japtym», - degen bolatyn Gennadıı Golovkın.

Foto: sports.kz