Golovkınniń chempıondyq beldikteri Elbasy kitaphanasyna qoıyldy

ASTANA. QazAqparat - Kásipqoı boksshy Gennadıı Golovkınniń Elbasy Nursultan Nazarbaevqa tartý etken chempıondyq beldikterin endigide Elbasy kitaphanasynda kórýge bolady, dep habarlaıdy QazAqparat.

Qazaqstandyq boksshynyń beldikteri «Qazaqstandaǵy olımpıada qozǵalysy»  turaqty ekspozıtsııasyna qoıyldy. 2018 jyldyń mamyrynda tusaýy kesilgen atalmysh ekspozıtsııada Memleket basshysymen kezdesý barysynda Olımpıada qozǵalysynyń jetekshileri, otandyq jáne sheteldik sportshylar syıǵa tartqan kádesyılar, marapattar jáne sport quraldary saqtalǵan.

 Bul jerde QR Prezıdentiniń sport salasyndaǵy memleket saıasatyn el ishinde ǵana emes, shekaradan tys ilgeriletkeni úshin alǵan marapattary da ornalasqan. Olardyń qatarynda sport uıymdary men qoǵamdar, qaýymdastyqtar men federatsııalar tartý etken marapattar, sondaı-aq QR UOK Qurmet belgisi (2000), «Speshıal Olımpıks Qazaqstan qozǵalysyn qoldaǵany úshin» estelik medali men belgisi (2002), Azııa Olımpıada keńesiniń ordeni (2007), FILA Halyqaralyq kúres qaýymdastyǵynyń altyn ordeni (2003) syndy ózge de  Olımpıada jáne Paralımpıada oıyndarymen baılanysty marapattar bar. Olardyń eń alǵashqysy, ári eń erekshesi - HOK prezıdenti Hýan Antonıo Samaranchtyń Memleket basshysyna tabystaǵan - «Eńbegi úshin» altyn Olımpıada ordeni (1997).

Eske salaıyq, bıylǵy 29 maýsym kúni Qazaqstan Prezıdentimen kezdesken Gennadıı Golovkın Elbasyna WBC, WBA (Super), IBO jáne IBF tujyrymdary boıynsha chempıondyq beldikterin syıǵa tartqan edi.

Memleket basshysy boksshyny «Qazaqstan Respýblıkasynyń Tuńǵysh Prezıdenti - Elbasy Nursultan Nazarbaev» ordenimen marapattady.

Gennadıı Golovkın - Qazaqstan Respýblıkasynyń eńbek sińirgen sport sheberi, kóptegen halyqaralyq týrnırlerdiń jeńimpazy. Atap aıtqanda, otandasymyz Qazaqstannyń jeti dúrkin chempıony, jastar arasyndaǵy álem chempıony (2000), QR І spartakıadasynyń chempıony (2001), Munaı elderi arasyndaǵy álem kýbogynyń jeńimpazy (2001), ІІІ Shyǵys Azııa oıyndarynyń chempıony (2001), Kásipqoılar arasyndaǵy álem chempıony (2003), Olımpıada oıyndarynyń vıtse-chempıony (2004), WBC, WBA (Super), IBO chempıony, «The Ring» jýrnalynyń nusqasy boıynsha barlyq salmaq sanatyndaǵy úzdik boksshy (2017), WBA, WBC, «Boxingnews24.com» belgili basylymynyń nusqasy boıynsha 2017 jylǵy úzdik boksshy.