Golovkınnen alynǵan IBF beldigine Djeıkobs pen Derevıanchenko talasýy múmkin

ASTANA. QazAqparat - Golovkın men Alvares kelissózderi tyǵyryqqa tirelgen soń «Kanelo» Gennadııdiń burynǵy qarsylasy Denıel Djeıkosbpen (34-2, 29 KO) mámile bastap jatyr, dep habarlaıdy SIA «SPORTINFORM» SAA.

«Eger Alvares pen Djeıkobs kelisimge kele almasa, amerıkalyq boksshy bos turǵan IBF tıtýlyn ýkraınalyq Sergeı Derevıanchenkomen (12-0, 10 KO) sarapqa salady», - deıdi menedjer Kıt Konnollı.

Konnollı Derevıanchenkonyń da, Djeıkobstyń da menedjeri. Ári bul eki boksshynyń bapkeri de bir - amerıkalyq maman Andre Roze.
«Qazir biz «Kanelomen» kezdesý ótkizý jóninde kelissózder júrgizip jatyrmyz. Biraq aldaǵy bir-eki kúnde kelisimge kele almasaq, onda Djeıkobs bul ıdeıadan bas tartyp, Derevıanchenkomen judyryqtasýyna týra keledi. Men bul týraly Rozemen sóılestim. Ol narazy bolǵanmen, jaǵdaıdy túsinip otyr», - deıdi Konnollı.

Eske sala keteıik, IBF beldigine úmitker Derevıanchenkomen kezdesýden boıyn aýlaq ustaǵany úshin Golovkın osy tıtýlynan aıyrylǵan bolatyn. Sodan keıin qazaqstandyq boksshynyń komandasy «Kanelonyń» komandasy aıtqan sharttarǵa kónýine týra keldi.

Alaıda meksıkalyq boksshynyń promoýteri Oskar de la Hoııa Alvares-Golovkın jekpe-jegin tek keler jyly 5 mamyrda uıymdastyrýǵa bolatynyn aıtyp otyr.