Golovkınmen kelissózder bastaldy: Alvarestiń promoýteri trılogııa jóninde aıtty

ASTANA. QazAqparat - Saýl Alvarestiń (51-1-2, 34 KO) promoýteri Oskar de la Hoııa boksshynyń aldaǵy josparlary jáne Gennadıı Golovkınmen ótýi múmkin úshinshi jekpe-jek týraly aıtty, dep habarlaıdy QazAqparat Sports.kz saıtyna silteme jasap.

«Sınko de maıo» - Las-Vegasta ótetin bokstaǵy eń úlken ýık-end. Sondyqtan biz Golovkınmen kelissózderdi bastadyq. Degenmen, «Kanelo» barlyǵy úshin ashyq. «Kanelo» eń myqty ataný úshin kimmen bolsa da kezdesýge daıyn. Kelissózder qaıda alyp keletinin kóremiz. Boksshynyń bedeli sarapqa salynǵaly tur. Al «Kanelo» óte tákappar boksshy. Sondyqtan, barlyq aıqastaryna jaqsy daıyndyqpen keledi. Ol áli de jas, bar bolǵany 28-de, aldaǵy joly uzaq. Degenmen, ol eń myqtylarmen judyryqtasqysy keledi», - dedi De la Hoııa.

Eske salaıyq, buǵan deıin Oskar de la Hoııa Tvıtterdegi akkaýntynda Golden Boy Promotions kompanııasynyń prezıdenti Erık Gomeske Golovkınmen kelissózderdi bastaý týraly tapsyrma bergenin jazǵan bolatyn.

Budan buryn úshinshi aıqas 4 mamyrda Las-Vegastaǵy (AQSh) T-Mobile Arena-da ótýi múmkin ekeni aıtyldy. Qazaqstandyq jáne meksıkalyq boksshylardyń birinshi jáne ekinshi jekpe-jekteri sonda ótken edi.

Golovkın-Alvares yqtımal trılogııasyna keıbir býkmekerlik keńseler mynadaı kotırovka usynýda: Alveristiń jeńisi - 1.47, Golovkınniń jeńisi - 2.7 jáne teń nátıje - 25.