Golovkınge álemniń absolıýtti chempıony bolý múmkindigi týdy

ASTANA. QazAqparat - ESPN Deportes ınsaıderi Salvador Rodrıges orta salmaqtaǵy álem chempıony Saýl Alvarestiń bolashaǵyna jáne onyń Gennadıı Golovkınmen úshinshi jekpe-jegine qatysty keıbir derekterdi jaıyp saldy, dep habarlaıdy QazAqparat Sports.kz-ke silteme jasap.

Jýrnalıst Golovkınniń «Kanelomen» úshinshi ret kezdesýge, sondaı-aq barlyq chempıondyq tıtýldardy jınap alý armanyn oryndaýǵa «kópir» mindetin atqaratyn qarsylasy kim ekenin aıtty. 

Telearnanyń habarlaýynsha, «Kanelo» keler jyly orta salmaqtaǵy barlyq chempıondyq tıtýldar úshin kúresip, álemniń absolıýtti chempıony atanýdy kózdep otyr. Bul rettegi alǵashqy jekpe-jegi 4 mamyr kúni Las-Vegastyń T-Mobile Arena arenasynda ótýi tıis. Oǵan IBF tujyrymy boıynsha álem chempıony Denıel Djeıkobs qarsylas bolýy múmkin. Eger Djeıkobsty jeńse, «Kanelonyń» aldynda tek Demetrıýs Endreıd ıelik etip otyrǵan WBO beldigi ǵana qalady.

Golovkınniń aldyndaǵy múmkinshilikterdiń biri retinde mamandar DAZN-men kelisimshartqa otyryp, keler jyldyń alǵashqy jartysynda Endreıdpen kezdesýdi aıtyp júr. Óıtkeni sony jeńse, qyrkúıek aıynda «Kanelomen» kezdesý quqyǵyna ıe bolady. Sonda boksshylar WBA (Super), WBC, WBO jáne IBF beldikterin sarapqa salady. ıAǵnı, sol jekpe-jektiń jeńimpazy orta salmaqtaǵy álemniń absolıýtti chempıony atanady. Al bul boks keshi Mehıkodaǵy áıgili «Atsteka» stadıonynda ótýi múmkin.