Golovkın jańa bapkerimen jumysy jáne ózgerister týraly aıtty

NUR-SULTAN. QazAqparat - Orta salmaqtaǵy burynǵy álem chempıony Gennadıı Golovkın Ring TV-ge bergen suhbatynda jańa bapkeri Djonaton Benkspen alǵashqy jumys aptasynan alǵan áserimen bólisti. Sondaı-aq Big Bear City-da qalyp, jattyǵý ornyn aýystyrmaý sebebin túsindirdi. Bul týraly QazAqparat Sports.kz saıtyna silteme jasap habarlaıdy.

GGG burynǵy bapkeri Abel Sanchespen kelisimshartty úzgennen keıin aty ańyzǵa aınalǵan Sheın Mozlıdiń lagerine kóship, Benkstiń basshylyǵymen 8 maýsymda Stıv Rolsspen ótetin aıqasqa daıyndalýda.

«Men ózimdi jaıly sezinemin. Daıyndyqty tolyqtaı ózgertetin ýaqytymyz bolǵan joq. Big Bear-dy jaqsy bilemin, sondyqtan osynda ózimdi jaıly sezinemin. Men Santa-Monıkada jattyqpaımyn. Nelikten Big Bear? Munda men tolyqtaı daıyndyqqa kirisip, ózimdi jattyǵý protsesine tolyǵymen arnaı alamyn.

- Burynǵy bapkeriń jaqyn jerde júrgenin jáne onymen kezdesip qalýyń múmkin ekenin bile tura ózińdi qalaı sezinesiz?

- Men ol týraly múldem oılamaımyn. Bul másele meni tolǵandyrmaıdy. Eger kezdesip jatsaq, qorqynyshty eshteńe bolmaıdy. Meniń tarapymnan eshteńe bolmaıtynyn naqty bilemin.

- Djonaton Benkspen jattyǵýlar qalaı ótip jatyr?

- Qyzyqty. Ol kóp nársege basqasha qaraıtyn adam. Ony baqylaǵan qyzyqty. Bul óz jemisin beredi dep oılaımyn. Ózim úshin jańa dúnıeler alatynyma úmittenemin.

Ózimdi stýdent sekildi sezingim keletinin aıttym. Kóp nárse úırengim keledi. Sebebi boks salasynyń shegi joq jáne ol túrlishe bolǵandyqtan, únemi ózińdi jetildirip otyrýyń kerek. Men ózimdi bokstaǵy stýdent retinde sezingim keldi. Djonaton bokstaǵy keıbir sátterge basqasha qaraıtyny qýantady.

- Úırenip úlgergen jańa, qyzyqty dúnıeler bar ma? Qupııańmen bólisseń.

- Qazir úırenip jatqandarymdy 8 maýsymdaǵy aıqasta kórsete alamyz dep oılaımyn. Barlyǵy oıdaǵydaı ótip, kelesi jekpe-jekte kórsetetin bolamyz dep úmittenemin.