Golovkın Rollspen jekpe-jegi aldynda baspasóz máslıhatyn ótkizdi
«Madison Square Garden»-ge qaıta oralǵanyma qýanyshtymyn. Bul úshin taǵy bir múmkindiktiń týǵanyna qýanyshtymyn. Bul men úshin ǵana emes, barlyq boks úshin tamasha jaǵdaı. Jankúıerlerime óz tájirıbemdi kórsetemin. Durys aıtasyzdar, kóp ýaqyt rıngten qalys qaldym. Biraq men anaǵurlym myqty, anaǵurlyq aqyldy bolyp oraldym! Barshańyzǵa alǵys aıtqym keledi, DAZN - men úshin úlken kelisimshart. Janymda senimdi adamdardyń baryn seziný keremet. Rolls - myqty boksshy, bul qaýipti sport. Senbi kúni bul naǵyz aıqas, jańa shoý bolady!», - dedi Golovkın.
Eske salaıyq, Golovkın-Rolls jekpe-jegi 8 maýsym kúni Nıý-Iork qalasyndaǵy «Madison Square Garden» arenasynda ótedi. Kezdesý aralyq salmaq - 164 fýntta ótedi. Gennadıı úshin bul kezdesý eki sebeppen erekshe bolmaq. Birinshiden, jańa bapkeri Djonatan Beenkspen alǵashqy aıqasy. Ekinshiden, jýyrda tıimdi kelisimshartqa qol qoıǵan DAZN strımıngilik platformasyndaǵy tuńǵysh jekpe-jegi.
Buǵan deıin boksshylar Nıý-Iork kóshesinde kóz arbasý rásimin ótkizdi. Sondaı-aq GGG bolashaqtaǵy josparymen bólisken bolatyn.
Boks keshin qazaqstandyqtar «Qazsport» telearnasynan tikeleı efırden kóre alady. Bastalýy - 9 maýsym, Nur-Sultan qalasynyń ýaqytymen tańǵy saǵat 06:00.
Aıta keteıik, keshtiń anderkardynda qazaqstandyqtar Álı Ahmedov amerıkalyq Markýs MakDenıelmen (15-0, 2KO), Bahtııar Eıýbov AQSh-tyń taǵy bir ókili Braıan Sebalomen (8-0, 4KO) kezdesedi.
Á.Ahmedov WBC tıtýly úshin synǵa túsedi.
«Qazsport» arnasynyń dırektory Pavel Tsybýlınniń aıtýynsha, qazaqstandyq ózge eki boksshynyń aıqasy efırge neshede shyǵatyny ázirge belgisiz. «Ol tek 8 maýsym kúni anyq bolady. Aldyn ala málimetter boıynsha, olar Genanyń jekpe-jegi aldynda birinen keıin biri aıqasatyn bolady. Al Golovkın efırge tańǵy 9:00 jáne 9:30 aralyǵynda shyǵatynyn naqty aıta alamyz», - dedi ol.