«Golovkın-Rolls» keshinde Álı Ahmedov WBC tıtýly úshin aıqasady

NUR-SULTAN. QazAqparat - «Golovkın-Rolls» aıqasynyń anderkartynda sharshy alańǵa shyǵatyn Álı Ahmedov WBC tıtýly úshin synǵa túsedi. Sondaı-aq, onyń osy keshtegi qarsylasy aýysqany belgili bolyp otyr, dep habarlaıdy QazAqparat tilshisi.

Aıta ketsek, 8 maýsymda Nıý-Iorktaǵy «Madison Square Garden» arenasynda boks keshi ótip, basty kezdesýde qazaqstandyq Gennadıı Golovkın (38-1-1, 34KO) men kanadalyq Stıv Rolls (19-0, 10KO) kezdesedi.

VKontakte áleýmettik jelisindegi «Qazaqstan kásipqoı boksy» paraqshasyndaǵy málimetke sáıkes, basty aıqastyń aldynda qazaqstandyq boksshy Álı Ahmedov AQSh ókili Markýs MakDenıelmen (15-0, 2KO) jekpe-jekke shyǵady. DAZN aqparatyna súıensek, 10 raýndtyq aıqasqa ekinshi orta salmaqtaǵy WBC International vakantty tıtýly tigiledi. Nur-Sultan ýaqyty boıynsha jekpe-jek 9 maýsym kúni saǵat túngi 03.00-de bastalady. Al basty aıqas - shamamen 09.00 kezinde ótedi.

Buǵan deıin Álı Ahmedov 34 jastaǵy amerıkalyq boksshy Abraham Hanmen kezdesetini habarlanǵan bolatyn. Alaıda búgin onyń qarsylasynyń aýysqany belgili boldy.

Sonymen birge Golovkın-Rolls aıqasynyń anderkartynda shyǵatyn taǵy bir qazaqstandyq boksshy Bahtııar Eıýbovtyń resmı posteri jarııalandy. Onyń qarsylasy - amerıkalyq boks juldyzy Braıan Sebalo (8-0, 4KO).

Eske salaıyq, 9 maýsymda ótetin boks keshine Danııar Eleýsinov te shyǵatyny habarlanǵanymen, keıin onyń belgisiz sebepterge baılanysty ol keshte óner kórsetpeıtini málim boldy.