Golovkın men «Kanelonyń» úshinshi jekpe-jegine qatysty DAZN túsinik berdi

NUR-SULTAN. QazAqparat - Qazaqstandyq boksshy Gennadıı Golovkın men meksıkalyq Saýl Alvares arasynda úshinshi jekpe-jek jóninde kelissóz júrip jatyr, dep habarlaıdy QazAqparat Sports.kz silteme jasap.

Budan buryn habarlaǵanymyzdaı, eki jaq ortaq kelisimge kele almaı, aıqas ótkizetin alańǵa qatysty qarama-qaıshylyq týyndaǵan bolatyn. Óıtkeni, Golden Boy men «Kanelo» jekpe-jekti Las Vegasta ótkizgisi keledi, al Golovkın buǵan túbegeıli qarsy.

Osyǵan qatysty DAZN strımıng platformasynyń atqarýshy dırektory Djon Skıpper túsinik berdi. Eske sala keteıik, qos boksshy da osy servıspen kelisimshartqa otyrǵan.

«DAZN platformasynyń jetekshisi Djon Skıpper «Kanelo» men Golovkınniń úshinshi ret qolǵap túıistirýin talap etip otyr. Ol sportshylar úshin kelesi jekpe-jek bolýy kerek jáne tezirek ótýi kerek, sebebi strımıng-servıs eki boksshymen de qomaqty kelisimshart jasaǵan. Sondyqtan jazylymdardy kóbeıtý úshin bul aıqas platformaǵa óte qajet», - dep jazady Boxingscene.com.