Golovkın men Kanelonyń aıqasy: Úshinshi jekpe-jektiń jeńisi kimniń enshisine buıyrady
Promoýteriń pysyq bolmasa...
40 jastaǵy GGG men 32 jastaǵy Kanelonyń teketiresi osydan 5 jyl buryn bastalǵan-dy. Amerıka Qurama Shtattarynyń Las Vegas qalasyndaǵy «T-Mobile» arenada ótken jekpe-jek qazaqstandyq boksshynyń kásipqoı mansaptaǵy jeńissiz aıaqtalǵan alǵashqy aıqasy bolyp tirkeldi. Ádiletin aıtsaq, otandasymyz kásipqoı alańda jolyqtyrǵan eń qaýipti qarsylas ta osy Kanelo bolatyn. Buǵan deıin Gennadıı Golovkınniń komandasy onyń salmaǵyndaǵy talaı myqtyǵa usynys tastaǵanymen, ol talpynystardyń bári sóz júzinde qalǵan. Ásirese Gennadıı Golovkın naǵyz babynda bolǵan kezeńde promoýterlerdiń oǵan laıyqty qarsylas shaqyryp bere almaǵany barsha qazaqstandyqtyń esinde shyǵar.
2017 jylǵa deıin Golovkınniń komandasy meksıkalyq Saýl Alvareske de birneshe ret usynys tastaǵan. Qazirgi kúnniń bıiginen qarap, Kanelonyń komandasy qazaqstandyq boksshymen shyǵatyn eń ońtaıly sátti jyldar boıy yjdaǵatpen kútkenin senimmen aıtýǵa bolady. Ol ońtaıly sát 2017 jyly keldi. 35 jasqa deıin óziniń deńgeıindegi boks sheberleriniń eshbirimen qolǵap túıistirýdiń retin taba almaı, ózinen áldeqaıda osal qarsylastaryn qýyp júrip sabap úırenip qalǵan GGG-ge 27 jasynda jalyndap turǵan Saýl Alvares qatty qarsylyq kórsetti. Esesine bul kezge deıin Kanelo otandasy Gabrıel Martınes, Mıgel Vaskes, Sheın Moslı, Floıd Meıýezer, Erıslandı Lara, Mıgel Kotto, Ámir Han, kishi Chaves Hýlıo Sesar sııaqty óz dáýiriniń aty shýly sportshylarymen kezdesip úlgergen bolatyn. Al qazaqstandyqtyń kásipqoı mansaptaǵy statıstıkasynda atalǵan boksshylarmen shendese alatyn bir de bir qarsylas bolmaǵan. Muny bireýler qazaqstandyq boksshynyń atymen bıznes jasap júrgenderdiń strategııasy saýatsyz bolǵanynan kórse, biri Golovkınniń usynysyn «elemegen-syǵan» boksshylardyń qorqaqtyǵy dep baǵalady. Sol «qorqaqtardyń» ishinde Saýl Alvarestiń ózi de bar bolatyn. 2016 jyly tipti GGG-men qolǵap túıistirmeý úshin chempıondyq ataqtarynyń birinen bas tartqandar da bar edi.
Qos juldyzdyń alǵashqy aıqasyna tóreshiler núkte qoıyp, teń tarqasty degen sheshim qabyldady. Bul aıqasta qazaqstandyq boksshynyń bir bas joǵary bolǵanyn aıtyp daýryqqan jankúıerler de boldy. Biraq kelesi jylǵy qarymta kezdesý Golovkınniń úlken bokstaǵy eń tegeýrindi jyldary artta qalǵanyn aıqyn kórsetip berdi. Tóreshiler meksıkalyqtyń jeńisin tirkedi.
Golovkınge ekinshi múmkindik syılaǵan jeńilis
Gennadıdiń budan keıingi jekpe-jekteri de ortanqol boksshylarmen ótti. Al Kanelo Sergeı Kovalev, Bıllı Djo Sonders sııaqty myqtylardyń belbeýin tartyp aldy. Bıyl mamyr aıynda meksıkalyq boksshy 9 jyldan keıin ekinshi jeńiliske tap keldi. Buǵan deıingi jalǵyz jeńilisi boks tarıhyndaǵy eń uly esimderdiń biri, kásipqoı mansabyn bir de bir jeńilissiz aıaqtaǵan Floıd Meıýezermen ótken jekpe-jekte tirkelgen bolatyn. 2022 jyldyń mamyrynda Qyrǵyz Respýblıkasynyń týmasy, reseılik Dmıtrıı Bıvol 12 raýndtyń qorytyndysy boıynsha 115-113 esebimen jeńiske jetti.
Sonymen, Gennadıı Golovkınniń Kanelomen úshinshi kezdesýge deıingi kásipqoı statıstıkasy mynadaı: 44 jekep-jek, 42 jeńis (37 nokaýt), 1 teń nátıje, 1 jeńilis.
Al Saýl Alvares Gennadıden 8 jas kishi bolsa da, kásipqoı rıngte áldeqaıda kóp aıqas ótkizip úlgergen – 60 jekpe-jek, 57 jeńis (39 nokaýt), 2 teń nátıje, 2 jeńilis.
Buǵan deıingi statıstıkany saraptasaq, meksıkalyq boksshynyń jeńýine múmkindik mol. Al túrli boks juldyzdarynyń eki tarapqa kezek-kezek basymdyq bergen boljamdary aldaǵy jekpe-jektiń «bolǵanynan boladysyn qyzyq etý» úshin jasalǵan marketıng tásilderi ekenin naǵyz jankúıerler jaqsy túsinip otyr. Degenmen, sport, sonyń ishinde osy boks ta eshbir boljamǵa, eshbir statıstıkaǵa baǵynbaıtyn tylsymdyǵymen tartymdy. Sondyqtan jeńisti birjaqty Kanelonyń qanjyǵasyna baılap berýge áli erte.
Qysqasy, GGG-diń kózsiz jankúıerleri Kanelonyń Dmıtrıı Bıvolmen bolǵan aıqastaǵydaı solǵyn óner kórsetýin tilep otyr. Al meksıkalyqtyń tasyn joǵary qoıýshylar Kanelonyń qaıraty qaıta bastady degenniń ózinde osydan 5 jyl burynǵy Golvokınniń jasyna áli jetpegenin alǵa tartady. Al qazaqstandyq boksshy 40-ty ortalap qalǵanyn aıttyq. Soǵan qaramastan, kásipqoı sporttaǵy eń mańyzdy kezdesýleriniń birine qol jetkizý úshin Gennadıı ózine úırenshikti bolyp qalǵan salmaqtan sýper orta salmaqqa aýysyp otyr.
«Buǵan deıingi eki aıqasqa qaraılamaı, munyń ózgeshe jekpe-jek degen oımen barynsha jattyǵý kerek. Men munyń ońaı aıqas bolmaıtynyna senimdimin. Meniń qarsylasym – chempıon, onyń tórt belbeýi bar. Ol osy salmaq dárejesindegi úzdik boksshy bolýy da múmkin. Men bul salmaqqa birinshi ret ótip jatyrmyn jáne osy dıvızıondaǵy úzdik boksshymen judyryqtasamyn. «Kanelony» jeńsem, ol meniń mansabymdaǵy iri jeńis bolar edi. Qatty qýanar edim», - degen bolatyn Gennadıı Las Vegas Review Journal-ǵa bergen suhbatynda.
Sýper orta salmaqtaǵy WBA (Super), WBC, IBF, WBO beldikteri úshin 17 qyrkúıekte ótetin jekpe-jekti «DAZN» atty aqyly strımıng servısi kórsetýge quqyq alǵan. Buǵan deıin áıgili otandasymyzdyń sońǵy jekpe-jekterin Qazaqstan jáne Qazsport arnalary kórsetken edi.
Las-Vegastaǵy T-Mobile Arena-da ótetin bul jolǵy kezdesýdi meksıkalyqtar qala kınoteatrlarynan tamashalaýǵa múmkindik alyp otyr.
Sports.kz-tiń málimetine súıensek, bul aıqastyń kepildendirilgen jalpy gonorary 80 mln dollar bolmaq. Tóreshiler sheshimimen teń aıaqtalǵan birinshi jekpe-jekte Saýl Alvares 40 mln dollar, jeńispen aıaqtalǵan ekinshi jekpe-jekte 30 mln dollar alǵan edi. Bıylǵy jekpe-jekten keminde 50 mln dollar gonorar alýǵa tıis. Bul jerde bılet satylymy men kórsetilimderden túsetin paıyzdar esepke alynbaǵan. Osylaısha meksıkalyq boksshy GGG-men ótkizgen 3 jekpe-jekten keminde 120 mln teńge taza paıda tabady degen sóz.
Al Gennadıı Golovkın bul kezdesýden nátıjesine qaramastan 30 mln dollar gonorar alady. Óıtkeni kepildendirilgen 80 mln dollar gonorardyń 50 mln dollary Kaneloǵa tıesili.
Foto: sports.kz