Golovkın men «Kanelo»: Úshinshi jekpe-jek týraly kelissóz tyǵyryqqa tireldi

NUR-SULTAN. QazAqparat - Fightsports.tv portalynyń jazýynsha, qazaqstandyq boksshy Gennadıı Golovkın men meksıkalyq álem chempıony Saýl Alvares arasyndaǵy úshinshi jekpe-jek jónindegi kelissóz tyǵyryqqa tireldi, dep habarlaıdy Sports.kz.

«Bul jóninde birinshi ret Sports Illustrated ókili Krıs Mennıks habarlady. Qos tarap arasyndaǵy kelissózden nátıje shyqpady. Óıtkeni, Golovkın aıqastyń Las-Vegasta ótkenin qalamaıdy. Ózderińiz biletindeı, «Kanelo» men Golovkınniń birinshi jáne ekinshi jekpe-jegi sonda ótken. Birinshisinde ekeýi teń tússe, ekinshi aıqasta Alvares jeńiske jetken bolatyn.

Qos tarap kelisimge kele almasa, ótken jylǵydaı bul joly da Alvarestiń promoýteri Oskar De La Hoııa orta salmaqtaǵy IBF, WBA jáne WBC chempıonyna 14 qyrkúıektegi jekpe-jek úshin basqa qarsylas izdeı bastaıdy.

Bul ádis buryn nátıjesin berse de, bul joly DAZN atqarýshy dırektory Djon Skıpperge kelgende túk shyqpaýy múmkin. Ol qyrkúıekte qos boksshyny kezdestirip, servıs jankúıerleriniń sanyn kóbeıtýdi josparlap otyrǵan bolatyn», - dep jazady basylym.