Golovkın men «Kanelo» úshinshi ret jekpe-jek ótkizýge kelisti

NUR-SULTAN. QazAqparat – WBA nusqasy boıynsha orta salmaqtaǵy qazirgi álem chempıony meksıkalyq Saýl Alvares pen sol salmaqtaǵy IBF jáne IBO belbeýleriniń ıegeri qazaqstandyq Gennadıı Golovkın úshinshi ret jekpe-jek ótkizýge kelisti, dep habarlaıdy QazAqparat Sports.kz portalyna silteme jasap.

Bul týraly jýrnalıst Maık Koppındjer Twitter-degi paraqshasynda habarlady. Onyń aıtýynsha, eki jaq birneshe aı buryn kelisimge otyrǵan.

Jýrnalıst derekkózderge silteme jasaı otyryp, osy aıqastan «Kanelo» - $45 mln, al Golovkın - $30 mln tabys tabatynyn aıtty. Ekinshi boks keshi uıymdastyrýshylarǵa $27 mln kiris ákelgendikten, úshinshi jekpe-jek kórermensiz ótpeıdi. Aıqastyń shamamen ótetin ýaqyty – 2021 jyldyń mamyry.

Eske sala ketsek, 2017 jyldyń qyrkúıeginde bolǵan alǵashqy jekpe-jek teń nátıjemen aıaqtalsa, ekinshi aıqasta tóreshilerdiń sheshimimen Alvares jeńiske jetken bolatyn.