Golovkın men Alvarestiń sóztalasy: qazaqtar álde meksıkalyqtar myqty?

ASTANA. QazAqparat - Qazaqstandyq boksshy Gennadıı Golovkın (37-0, 33 KO) men meksıkalyq Saýl Alvares (49-1-1, 34 KO) Maxim jýrnalyna bergen suhbatynda óz ulttaryn salystyrdy, dep habarlaıdy QazAqparat Sports.kz -ǵa silteme jasap.

-      Olar da, ózgeler de - óte myqty. Qazaqtar, orystar... osy óńirdegi barlyq jaýyngerler óte myqty, betpe-bet kelýden jasqanbaıdy, kúshteri kóp. Biraq meksıkalyqtar da dál sondaı. Men de dál solaı turamyn jáne óz qabiletterim men kontrshabýyldarymdy qoldanǵandy unatamyn. Meksıkalyq stıl jaqsy jekpe-jekke negiz bolady», - dep sanaıdy «Kanelo».

-      Biz - turpatymyz óte uqsas adamdarmyz, bul turǵyda eki ulttyń da jaqyndyǵy bar. Jaqsy ári myqty jaýyngerler», - dep qosty GGG.

Eske salaıyq, Golovkın-Alvares jekpe-jegi 16 qyrkúıek kúni Las-Vegastaǵy «T-Mobile Arena»-da ótedi.

Keshe bul kezdesýdiń bastalatyn ýaqyty belgili bolǵanyn aıtqan edik.

«Negizgi shara Shyǵys jaǵalaýy ýaqytymen keshki saǵat 11-den keshikpeı bastalady. Sondyqtan jýrnalıster men jankúıerler 12 nemese túnniń ortasyna deıin kútip otyrmaıdy. Bul aıqasty saǵat 11-de  kóre alasyzdar», - degen bolatyn Golden Boy promoýterlik kompanııasynyń basshysy De La Hoııa Nıý-Iorkte ótken baspasóz konferentsııasynda.

Osylaısha, qazaqstandyq kórermender úshin jekpe-jek 17 qyrkúıek, jeksenbi kúni tańǵy saǵat 9-dan keshikpeı bastalady.

Bul jekpe-jek orta salmaqtaǵy álem chempıony Gennadıı Golovkın úshin sporttyq mansabyndaǵy sońǵysy bolýy múmkin.

«Men osy jekpe-jekten keıin kásibı sporttan ketetin shyǵarmyn. Bálkim, ketpeımin. Men óz babymdamyn jáne ózimdi 25 jastaǵydaı sezinemin. Alaıda bul fýtbol emes, boks. Boks oıyn emes, jan beretin báseke. Básekeniń qaı-qaısy bolmasyn ózinshe aýyr», - dedi G. Golovkın.