Golovkın men Alvares sońǵy baspasóz máslıhatynda kóz arbasty

ASTANA. QazAqparat - V Las-Vegasta qazaqstandyq boksshy Gennadıı Golovkın (37-0, 33 KO) men meksıkalyq Saýl Alvarestiń (49-1-1, 34 KO) jekpe-jegi aldyndaǵy sońǵy baspasóz máslıhaty ótti, dep habarlaıdy QazAqparat Sports.kz-qa silteme jasap.

Buǵan deıin habarlaǵanymyzdaı, Golovkın bul kún «Kanelo» ekeýine ǵana emes, bútin boks úshin mańyzdy ekendigin aıtyp , bul jekpe-jekti tarıhı oqıǵa dep atady.

Alvares bolsa, aıqas qıyn bolatynyn moıyndap, biraq oǵan tas-túıin daıyn otyrǵanyn jetkizdi.

Golovkınniń tálimgeri Abel Sanches onyń bul aıqasqa júz paıyz daıyn ekendigin qadap aıtty. Al «Kanelonyń» bapkeri Hose Reınoso GGG-diń stıli meksıkalyq bolǵanymen, Alvarestiń ózi meksıkalyq ekendigin jáne onda stıl de, júrek te baryn Sanchestiń esine saldy.

Sondaı-aq Alvarestiń promoýteri Oskar de la Hoııa 20 jyldan keıin balalarymyz Golovkın men «Kanelo» týraly aıtatyn bolady degen úmitin bildirdi.

Shara sońynda boksshylar «kózqarastar dýelin» ótkizdi.

Eske salaıyq, 16 qyrkúıek kúni AQSh-tyń Las-Vegas qalasyndaǵy «T-Mobile» arenada Gennadıı Golovkın men Saýl Alvarestiń kópten kútken jekpe-jegi ótedi. Aıqasty «Qazaqstan» jáne «Qazsport» telearnalary tikeleı efırden kórsetedi. Ýaqyt aıyrmashylyǵyna baılanysty translıatsııa 17 qyrkúıek kúni saǵat 6:00-de bastalady.