Golovkın qazaqstandyq boks mektebiniń myqty ekenin dáleldedi - Arystanbek Muhamedıuly

ASTANA. QazAqparat - QR Mádenıet jáne sport mınıstri Arystanbek Muhamedıuly Gennadıı Golovkındi kezekti jeńisimen quttyqtady, habarlaıdy QazAqparat.

«Bizdiń Gena naǵyz batyr!  Qorjynda taǵy bir jeńis. Shyn júrekten GGG komandasy men barlyq boks jankúıerlerin jarqyn jeńispen quttyqtaımyn! Qurmetti Gennadıı Gennadıevıch qazaqstandyqtar Sizdiń jeńiske sendi. Amerıkalyq Vanes Martırosıanmen bolǵan kezdesýde Siz ózińizdiń myqty qasıetterińizdi baıqatyp, qazaqstandyq boks mektebiniń álemde eń myqty ekenin dáleldedińiz. Al, Sizdi álem áldeqashan moıyndap qoıǵan», - dep jazdy mınıstr Fesbýktegi paraqshasynda.

Osy oraıda A. Muhamedıuly qazaqstandyq sportshy G. Glovkınniń jeńisteri  álemdik boks tarıhynda máńgilikke saqtalyp qalatynyn atap ótti.

«Jastar Sizge qarap boı túzeıdi. Siz sportshy jastar úshin úlgisiz. Taǵy da, jeńisińizben quttyqtaı kele, myqty densaýlyq, otbasyńyzǵa amandyq, rıngte jarqyn jeńister tileımin!», - dedi mınıstr.

Aıta keteıik, Qazaqstandyq Gennadıı qarsylasy Vanes Martırosıandy jeńip, óz tıtýldaryn qorǵady. Sonymen qatar, Karsondaǵy (AQSh, Kalıfornııa shtaty) StubHub Center arenasynda Gennadıı Golovkın qarsylasy Vanes Martırosıandy jeńgennen keıingi áserimen bólisti.