Golovkın Qazaqstanda ótýi yqtımal jekpe-jegi boıynsha kelissózdi bastady

ASTANA. QazAqparat - Orta salmaqtaǵy burynǵy álem chempıony, 41 jastaǵy qazaqstandyq boksshy Gennadıı Golovkın (42-2-1, 37 KO) 34 jastaǵy brıtandyq Djon Raıdermen (32-6, 18 KO) jekpe-jek ótkizý jóninde kelissózdi bastady, dep habarlaıdy QazAqparat Sports.kz-ke silteme jasap.

Bul týraly Raıdermen suhbattasqan GiveMeSport jýrnalısi Charlı Sıms málimdedi. Golovkın jekpe-jekti Qazaqstanda ótkizýdi usynǵan.

«Djon Raıdermen jaqsy áńgime boldy. Golovkınmen kelissózder bastaldy, Gennadıı myrza kezdesýdi Qazaqstanda ótkizýdi usyndy», - dep habarlady Sıms.

Esterińizge sala keteıik, Raıder men Golovkın sońǵy jekpe-jekterinde tóreshilerdiń biraýyzdan qabyldaǵan sheshimimen meksıkalyq Saýl «Kanelo» Alvaresten (58-2-2, 39 KO) jeńilgen edi.

Buǵan deıin Golovkın amerıkalyq boksshy Edgar Berlangamen (21-0, 16 KO) aıqas ótkizse, oǵan 15 mıllıon dollar tólenetini týraly habarlanǵan bolatyn.