Golovkın - «Kanelo» úshinshi jekpe-jeginiń ótpeýi múmkin

ASTANA. QazAqparat - Fightnights.com saıtynyń jazýynsha, jankúıerler Gennadıı Golovkın (38-1-1, 34 KO) men Saýl Alvares (51-1-2, 34 KO) arasyndaǵy úshinshi aıqasty kúte almaýy múmkin, dep habarlaıdy Sports.kz.

Basylymnyń derekterine qaraǵanda, mamyr aıynda «Kanelo» sýperorta salmaqta WBO chempıony atanǵan otandasy Hılberto Ramırespen (39-0, 25 KO) kezdesedi. Alvares osy dıvızıonda taǵy bir-eki jekpe-jek ótkizýi múmkin. Bul, óz kezeginde, sáýirde 37-ge tolatyn Golovkınmen úshinshi aıqasty ótkizý múmkindigin azaıtady.

«Eger Alvares 168 fýnttyq dıvızıondy biriktirip jekpe-jek ótkize berse, Golovkınmen úshinshi kezdesý túbinde bola ma, joq pa sony baqylap otyrýdyń ózi bir qyzyq dúnıe emes pe», dep jazady Fightnights.com avtory Raıan O'Hara.

Eske sala keteıik, jeltoqsanda «Kanelo» Rokkı Fıldıngti (27-2, 15 KO) jeńip, sýperorta salmaqta WBA chempıony atanǵan bolatyn.