Golovkın - «Kanelo» úshinshi aıqasyna úsh álem chempıony boljam jasady

NUR-SULTAN. QazAqparat - Burynǵy álem chempıondary Barrı Makgýıgan, Ýeın Makkaloh jáne Raýl Markes meksıkalyq Saýl «Kanelo» Alvarestiń (57-2-2, 39 KO) jáne qazaqstandyq Gennadıı Golovkınniń (42-1-1, 37 KO) 17 qyrkúıekten 18 qyrkúıekke qaraǵan túni Las-Vegasta (AQSh) ótetin úshinshi jekpe-jegine boljam jasady, dep habarlaıdy QazAqparat Sports.kz saıtyna silteme jasap.

Bári de túrli tásilmen Alvarestiń jeńetinin boljap jatyr.

«GGG buǵan deıingi aıqastarda jeńdi dep esepteımin, biraq ol 40 jasynda mundaı aıqasta jeńetindeı bul oıynda uzaǵynan júr. Golovkın Mýrataǵa qarsy jekpe-jekte ózin jaqsy kórsetti, biraq ol japondyq boksshynyń kóp soqqysyn jiberip alǵany bilinip qaldy. «Kanelo» myqty Bıvoldan jeńilip qalsa da, Golovkın ol sııaqty áreket ete almaıdy. Sondaı-aq, Alvares GGG-di 76,2 kelige deıin kóterilýge májbúrledi. Sonymen barlyq basymdyq Saýlde», - dep esepteıdi burynǵy jartylaı jeńil salmaqtaǵy álem chempıony ırlandyq Makgýıgan.

«Olardyń aıqasy taǵy barlyq qashyqtyqtan ótedi. GGG sońǵy aıqasynda jeńse de, keremet oıyn kórsete almady. Al «Kanelo» tipti jeńilip qaldy. Meniń oıymsha, ekeýi de qartaıdy. «Kanelonyń» Golovkındi jeńetindeı kúshi áli bolýy kerek, biraq GGG sońyna deıin aıqasady. «Kanelo» upaımen jeńedi», - dep boljam jasady jeńil salmaqtaǵy burynǵy álem chempıony Makkaloh.

«Kóp adamdar oılaǵannan da jaqsy aıqas bolady. Biraq, jeńisti bar jan-tánimen qalaıtyn «Kanelo» - óte qaýipti qarsylas. Ol keıingi raýndtarda jeńedi dep oılaımyn», — dep pikir bildirdi birinshi orta salmaqta álem chempıony bolǵan meksıkalyq Markes.

Foto: sports.kz