Golovkın - «Kanelo» aıqasyna qansha jankúıer barady - Las-Vegas

ASTANA. QazAqparat - Álemdik oıyn-saýyq jáne oıyn bıznesiniń astanasy Las-Vegas osy jyldyń basty sporttyq oqıǵalarynyń biri - Gennadıı Golovkın men Saýl «Kanelo» Alvarestiń ekinshi jekpe-jegin qabyldaýǵa daıyndalyp jatyr, dep habarlaıdy Sports.kz.

ESPN Deportes habarlaǵandaı, qalaǵa shamamen ótken jylǵy aıqastaǵydaı týrıster keledi dep eseptelýde. Derekterge sáıkes, 2017 jyly Las-Vegasta Meksıkanyń táýelsizdik kúnine oraı demalys kúnderi qonaqúılerdiń 98,7%-y, 149 myń nómir tolyp qalǵan. GGG men «Kanelo» ekinshi aıqasyna qalaǵa 65 myń qonaq keledi dep josparlanýda.

Osy aptada Las-Vegasta aldaǵy shoýǵa baılanysty birqatar resmı is-sharalar ótedi: boksshylardyń kelýi, baspasóz máslıhaty jáne jattyǵýdyń ashylýy, sondaı-aq salmaq ólsheý rásimi. Boks keshi 15 qyrkúıekte T-Mobile Arena-da ótedi.

Qazaqstandyq kórermender 16 qyrkúıek kúni tańǵy saǵat 6-da tikeleı efırden tamashalaıtyn bolady. Ony «Qazsport» jáne «Qazaqstan» telearnalary kórsetedi. Basty jekpe-jek 08:00-den 08:30 aralyǵyna josparlanǵan.