Golovkın Djeıkobsqa qarsy jekpe-jekten rekordty tabys tapty

ASTANA. QazAqparat -  PPV satylymnyń kórsetkishi asa joǵary bolmaǵanyna qaramastan, WBC/WBA/IBF/IBO tujyrymdary boıynsha orta salmaqtaǵy (72,6 kelige deıin) álem chempıony Gennadıı Golovkınniń (37-0, 33 KO) komandasy Denıel Djeıkobsqa (32-2, 29 KO) qarsy aıqastan túsken tabys kórsetkishine kóńilderi toldy, dep habarlaıdy QazAqparat sports.kz saıtyna silteme jasap.

Eske salsaq, 18 naýryz kúni Nıý-Iorkte (AQSh) Golovkın tóreshilerdiń biraýyzdy sheshimimen upaı sany boıynsha Djeıkobsty jeńip, chempıondyq ataǵyn qorǵap qaldy.

«Madison Square Garden trıbýnalaryna bıletterdi satý $3,7 mıllıon  dollardan asty. Bul 2015 jylǵy qazanda bolǵan Davıd Lemege qarsy jekpe-jek kórsetkishinen eki esege kóp, - dedi chempıonnyń promoýteri Tom Leffler. - Shoýdy halyqaralyq kórsetý quqyǵyn 100-den astam el  satyp aldy. Bul Gennadııdiń buryn-sońdy aıqastarymen salystyrǵanda, qomaqty túsim».

«Golovkın demeýshilerden, sonyń ishinde  Hublot jáne Chivas-tan da rekordtyq tabys aldy».

Budan basqa, senbi kúni GGG fırmalyq belgisin satýdan túsken kiris 150 myń dollardan asyp jyǵyldy. Bul Golovkınniń  Lememen aıqasyndaǵy kórsetkishten kóp (124 myń dollar).

«Al PPV satylymy aqyly kórsetilim júıesi boıynsha Gennadııdiń alǵashqy aıqasynyń boljaldy kórsetkishinen asyp túsip, 153 000 jazylýshyny qurady. Biraq naqty sandar áli de sanalý ústinde».