Golovkın aldaǵy jekpe-jekte «Kanelony» tań qaldyrýǵa ýáde berdi
«Árbir jekpe-jek ártúrli bolǵanymen bul joly naǵyz aıqas, armandaǵan jekpe-jek bolady. Bizdiń dene pishimimiz de, kúshimiz de, stılimiz de birdeı. Biz birge jattyqtyq ta. Sondyqtan bir birimizdi óte jaqsy bilemiz. Biraq, ol jekpe-jegimizde mindetti túrde bir jańa óner kórsetedi. Men de óz kezegimde jańa aıqas kórsetetin bolamyn. Bapkerim Abel Sanchespen kóptegen ıdeıamyz bar. Menińshe, «Kanelomen» jekpe-jek sporttyq mansabymdy aıqyndaıtyn bolady», - dedi Genadıı Golovkın.
Eske salaıyq, 16 qyrkúıekte Gennadıı Golovkın meksıkalyq boksshy Saýl Alvarespen judyryqtasady. Osy jekpe-jekte Alvares GGG-diń tek eki ataǵy - WBA men IBF belbeýleri úshin ǵana talasady. Golovkın utylyp qalsa, onyń taǵy eki belbeýi - WBC men IBO bos qalyp, ony basqa boksshylar ózara sarapqa salady. Al qazaqstandyq boksshy jeńiske jetse, tórt belbeýine taǵy The Ring jýrnalynyń arnaıy belbeýin qosyp alady. Atalǵan basylym ony arnaıy Alvares úshin shyǵarǵan bolatyn. Ýaqyt aıyrmashylyǵyna baılanysty Qazaqstanda jekpe-jektiń tikeleı kórsetilimi 17 qyrkúıek kúni tańerteń kórsetiledi.
Gennadıı Golovkın (37-0, 33 KO) men Saýl Alvarestiń (49-1-1, 34 KO) alda bolatyn jekpe-jegin uıymdastyrýshylar bıletterdiń satylymynan ǵana 30 mıllıon dollar tabys tapty. Baǵasy 300-den 5 000 dollarǵa deıin bolǵan bul aıqastyń bıletteri shilde aıynyń basynda satylyp ketken.
Osylaısha, bılet satylymy boıynsha Las-Vegasta ótetin Golovkın - Alvares jekpe-jegi 72,2 mln dollar jınaǵan kishi Floıd Meıvezer (50-0, 27 KO) men Mennı Pakıao (59-7-2, 38 KO) aıqasynan ǵana kem túsip tur. Meıvezerdiń Alvarespen aıqasyna toqtalar bolsaq, ol jekpe-jektiń bılet satylymynan túsken qarjy 20 mln dollardy quraǵan.