Golovkın-Alvares revanshyna alynǵan bıletterdi qaıta qabyldaý bastaldy

ASTANA. QazAqparat - Qazaqstandyq bylǵary qolǵap sheberi Gennadıı Golovkın (37-0-1, 33 KO) men dopıng daýyna ilikken meksıkalyq Saýl «Kanelo» Alvares (49-1-2, 34 KO) arasyndaǵy 5 mamyrǵa belgilengen revanshtyń bolý-bolmaýy shamamen eki aptadan soń belgili bolady, dep habarlaıdy «SPORTINFORM» SAA.

Jekpe-jek Alvarestiń dopıng-synamasy oń nátıje berýine baılanysty keıinge qaldyrylýy nemese múldem bolmaýy múmkin.

Budan buryn meksıkalyq boksshy Nevada shtaty Atletıkalyq komıssııasynyń (NSAC) sheshimimen sporttan ýaqytsha shettetilgen edi. Onyń budan arǵy taǵdyry atalǵan komıssııanyń 10 sáýirde ótetin otyrysynda belgili bolady.

Degenmen, MGM Resorts International kompanııasy jankúıerlerge T-Mobile arenasyna satyp alynǵan bıletterdi ótkizý jáne olardyń qunyn 100 paıyz ótep berý bastalǵanyn málimdedi. 

Bul jaıly MGM Resorts-qa silteme jasap Las Vegas Review-Journal habarlaıdy.

Eske salaıyq, meksıkalyq boksshy Saýl Alvaresten alynǵan dopıng synamalardyń birinen tyıym salynǵan preparat - klenbýterol tabylǵany týraly 6 naýryzda belgili bolǵan edi.