Golovkın-Alvares revanshy ótpeıtin boldy ma

  ASTANA. QazAqparat - AQSh-tyń Nevada shtatyndaǵy atletıkalyq komıssııasy meksıkalyq boksshy Saýl Alvaresti 18 sáýirge deıin barlyq jarystardan shettetti. 

Sebebi onyń qanynda «klenbýterol» atty dopıng tabylǵan bolatyn. Degenmen, komıssııa óz sheshimin sál keshteý shyǵardy. Golovkınniń qattyraq aıtqan sózderi bolmaǵanda ony da sózbuıdaǵa salatyndaı kóringen. Endi, eki boksshynyń jekpe-jegi ótpeı qalady degen qaýip bar. Sebebi HBO-nyń ózi jarnama berýdi toqtatty. Jekpe-jektiń promoýsheni de toqtatyldy. Shynymen de, jankúıerler asyǵa kútken revanshty mamyr aıynda kóre almaı ma? Alvaresti uzaq ýaqytqa shettetse, ol kúni Golovkın kimmen bokstasady? GGG-diń sońǵy málimdemesi qanshalyqty oryndy boldy? Onymen Genadıı óz qolymen revanshty keıinge shegerip tastamaı ma? QazAqparat tilshisi osy suraqtardyń tóńireginde oı tarqatyp kórdi.

Golovkınniń qahary qatty

Búginde kásibı boksta kóp jaǵdaıda bıznestiń bedeli basym. Belbeýden buryn fanaty kóp boksshylardyń bıligi júredi. Solar talap qoıady, solardyń yńǵaıyna jyǵylý qajet. Gennadıı Golovkın men Saýl Alvarestiń qarym-qatynasy da solaı bastaldy. GGG tórt birdeı belbeýdiń ıegeri bolsa da, meksıkalyq juldyzdy eki jyl boıy kútti. Sonda alǵashqy jekpe-jekti ótkizý úshin úmitker chempıondy emes, chempıon úmitkerdi tosyp júrdi. Tosyp júrgeni bar bolsyn, ekijaqty kelisimde revanshty talap etý quqyǵy tek Alvareske ǵana berildi. Gonorardyń biraz bóligi de sonyń enshisine jazyldy. Gennadıı oǵan da kelisti. Áli esimizde, sol jekpe-jektiń promoýsheni kezinde «Kanelo»-nyń komandasy meksıkalyq boksshynyń fotosyn tek birinshi orynǵa ǵana qoıýdy talap etti. Bir rette eki boksshy kezekti baǵdarlamanyń túsirilimine kelse, bannerde Gennadıı birinshi bolyp tur. Golden boy-dyń jigitteri birden shý kóterip, artqy fondy aýystyrtyp aldy. Sonda da Golovkın sypaıy minezinen aınyǵan joq. Al jekpe-jekte eki birdeı tóreshi ádiletsizdik jasap, jalpy esepti teń etip shyǵarǵanda jerlesimiz: «Eń bastysy, men barlyq tıtýldarymdy saqtap qaldym», - dep ózin de, jankúıerlerin de jubatty. Biraq ishi alaı-dúleı bolǵany sózsiz.

Naýryzdyń basynda dopıng daýy burq ete qaldy. Alvarestiń aqpan aıyndaǵy synamalarynan «klenbýterol» atty dopıng tabyldy. Atalǵan dáriniń kómegimen salmaqty jyldam tastap, bulshyq etti qysqa ýaqyttyń ishinde ósirýge bolady eken. «Kanelo» birden at-tonyn ala qashty. Bárin Meksıkada óndiriletin sıyr etine japty. «Sony jegende ishime «klenbýterol» túsip ketti», - dep aqtaldy. Shynymen de, ol jaqtyń fermerleri sıyrdyń maıyn azaıtyp, etin kóbirek alý úshin jańaǵy zatty jıi qoldanady. Buǵan deıin et arqyly klenbýteroldyń sportshynyń aǵzasyna ótip ketken jaǵdaılar da boldy. Degenmen, keıbir sport sarapshylary Alvarestiń ýájine sengen joq. «Kanelo» sııaqty boks juldyzynyń komandasy qaıda qarady? Ondaı sportshynyń ókilderi sapasyz etti qalaısha baıqamaı qaldy?» degen suraqtar qarsha borady. Bizdiń Gennadıı bolsa, taǵy óz qarsylasyn qatty synaǵan joq. Tergeýdiń ádildigine senemin dedi. Biraq meksıkalyq juldyzǵa qatysty eshqandaı shara qoldanylmady. GGG-diń bapkeri Abel Sanches alǵashqy jekpe-jek kezinde Alvarestiń qolyn dákimen emes, arnaıy lentamen oraǵanyn jarııalap, Golden boy-dy qysyp kórgen edi. Odan da eshteńe shyqpady. Boks uıymdarynyń keıbir jylmaqaı basshylary da Alvaresti qorǵashtap shyǵa keldi. Sóz joq, bunyń barlyǵy Gennadııdiń júıkesine áser etpeı qoımady. Kóp uzamaı, Golovkın «jaryldy». Shydamnyń taýsylýyna «Kanelonyń» alǵashqy salmaq ólsheýde báriniń kózinshe belgisiz bir tabletkany jutqany sebep bolǵan sııaqty.

Pýblıkatsııa ot •°Team GGG KZ | 5.05 G°vs°C 2🔥 (@war_ggg_canelo) 22 Mar 2018 v 3:06 PDT

Gennadıı sol kezde onyń denesinde ekpeniń izderin de kórgenin málimdedi.

«Másele meksıkalyq ette emes. «Kanelo» jáne onyń komandasy bárin aldap otyr. Olar dopıngti qoldandy. Endi, aınaladaǵy adamdardyń barlyǵy túk bolmaǵandaı júr. Men anyq kórdim, «Kanelonyń» bulshyq etteri tym qatty ósip ketti. Ekpeniń izderi de boldy. Vıdeoda ol belgisiz bir tabletkalardy qabydap jatyr. Oskar De La Hoııa da sondaı. Ol da taza adam emes. Fotony alyp, dárigerlerge kórseteıik. Eń durysy, olardy ótirikti anyqtaıtyn detektormen teksereıik», - dedi G.Golovkın. GGG-diń ashýlanǵany sonsha, birinshi jekpe-jektiń nátıjesin burmalaǵan adamdardy «terrorıster» dep atady. «Olar sportty qurtyp jatyr. Ondaı adamdardy túrmege otyrǵyzý qajet. Dopıng qabyldaıtyndardy da sol jaqqa jiberý kerek. Bul Amerıka emes pe? Bul jerde demokratııa bar ǵoı», - dep atap kórsetti Golovkın.

 

GGG-diń promoýteri Tom Lefflerdiń sózine qaraǵanda, dál sol foto men vıdeony Golovkınge jankúıerler jiberdi. Barlyǵy máseleniń anyq-qanyǵyn komıssııadan surap alýǵa keńes berdi. Al Abel Sancheske Golovkınniń «jańa obrazy» unap otyr. Onyń oıynsha, GGG-diń ashýy aldaǵy revanshtyń odan da qyzyqty ótýine sebep bolady.

«Kanelo» da qaharyna mingen sııaqty. Onyń promoýteri Oskar De La Hoııa GGG-ge «doktor» dárejesin berip, onyń aıtqan sózderine qatty ashýlanǵanyn jetkizdi. «Birinshiden, «doktor Golovkınniń» meni taza emes boksshy dep aıyptaǵany ashýyma qatty tıdi. Abel Sanches degen marıonetka da dym qaqpaıdy. Meni ótirikshi dep otyr. Bul jigitterge sózge abaı bolý kerek. «Kanelo» úshin eshteńe aıtpaı-aq qoıaıyn. Tergeýden keıin ol ózi málimdeme jasaıdy. Ol - taza ári ádil boksshy. Saýl de qatty ashýlanyp otyr. Golovkınniń byt-shytyn shyǵaramyn deıdi. Menińshe, Gennadıı utylatynyn sezip otyr. Sol sebepti halyqtyń kóńilin basqa jaqqa buryp jatyr. Dál osy sózderinen keıin «Kanelo» ony nokaýtpen jeńedi», - deıdi Oskar De La Hoııa.

Revansh ótpeı qalsa, Golovkınniń qarsylasy kim bolady?

Golovkınniń sońǵy málimdemesinen keıin Nevada shtatynyń atletıkalyq komıssııasy Alvaresti 10 sáýirge deıin jarystardan shettetti. Kúni keshe atalǵan dıskvalıfıkatsııa taǵy 8 kúnge uzartyldy. ESPN arnasynyń jýrnalısi Den Rafaeldiń aıtýynsha, komıssııa tóraǵasy Bob Bannet Alvarestiń ústinen shaǵym túsirip, osy iske qatysty tyńdaýlardy taǵy bir aptaǵa uzartsa, revansh anyq ótpeı qalýy ábden múmkin. Sebebi arǵy jaǵynda on bes kún ǵana qalady. Sosyn atletıkalyq komıssııa kóp isterdi keıinge shegere bermeıdi. Revansh ótpeı qalsa, Alvarestiń komandasyna aıyppul tóleýge týra keledi. Al Golovkın ózine basqa qarsylasty izdeýge májbúr bolady.
 

WBO belbeýiniń ıegeri Bıllı Djo Sonders jaraqatyna baılanysty maýysymnyń aıaǵyna deıin judyryqtasa almaıdy. Dennı Djeıkobs bolsa, sáýirdiń aıaǵynda Matseı Sýletskıge qarsy shyǵady. Arǵy jaǵynda bir-aq apta. Sondyqtan ol da Alvaresti almastyra almaıdy. Djermall Charlo da eki apta buryn jekpe-jek ótkizedi. Sonda eki boksshy ǵana qalyp otyr. Olar - Demetrıýs Andrade men Rıota Mýrata. Sondaı-aq, Sergeı Derevıanchenkony da umytpaý qajet. Degenmen, barlyq úmitkerlerdiń ishinde brıtandyq Bıllı Djo Sonderstiń orny bólek. Sebebi onyń qolynda sońǵy belbeý bar. Golovkın ony jeńip alsa, óz salmaǵynda absolıýtti chempıon atanady. GGG-diń komandasy da Alvares shyqpaı qalsa, sońǵy belbeýdi alýǵa kúsh salatynyn aıtyp qaldy. Bıllıdiń ózi Golovkın úshin bárin tastap, onyń aıtqanyna júgirmeımin degenge keltirdi. Alaıda onyń promoýteri Frenk Ýorrenniń sózine qaraǵanda, Bıllıdiń jaraqaty qatty emes tárizdi. «Árıne, «Kanelo» shyqpaı qalsa, Golovkınge myqty bir qarsylas qajet bolady. Ol qarsylas - Bıllı Djo Sonders. Barlyq tıtýldardy sarapqa salyp, úlken boks keshin uıymdastyrýǵa bolady. Biraq Bıllı qolyn jaraqattap aldy. Sol sebepti Martın Mıýrreıge qarsy jekpe-jekti 23 maýsymǵa shegerdik. 5 mamyrda rınge shyǵa ala ma, joq pa, ony osy aptada anyqtaımyz. Bıllı GGG-ge qarsy shyqsa, 80-90 protsentke emes, 100 protsentke daıyn bolady», - dep atap kórsetti F.Ýorren. Onyń oıynsha, Golovkın-Sonders jekpe-jegin Londonda ótkizýge bolady. Degenmen, bir nárse anyq, kelissózder kezinde Bıllı Djo Sonders óz belbeýin saýdaǵa salyp, odan barynsha kóp aqsha shyǵarýǵa tyrysady.

Nevada qandaı sheshim qabyldaıdy?

Shyny kerek, komıssııa Alvarestiń dıskfalıfıkatsııasyn jaıdan-jaı keıinge shegerip otyrǵan joq. Olar «Kanelo» sııaqty kásibı boks juldyzyna qatysty sheshimniń basqa oqıǵalarǵa da pretsendent bolatynyn jaqsy túsinedi. Qazir meksıkalyq boksshyǵa jeńildik jasasa, erteń basqa boksshylar da «klenbýterol» úshin jeńildik talap etedi. Sosyn ádiletsiz sheshimniń kesirinen Las-Vegastyń, jalpy Nevada shtatanyń bedeli túsip ketýi múmkin. Aldaǵy ýaqytta atalǵan shtat úlken jekpe-jekterden aıyrylyp qalýy yqtımal. Sol sebepti komıssııa barynsha ádil sheshim shyǵarýǵa tyrysady degen senim bar. Sarapshylardyń sózine qaraǵanda, Alvaresti alty aıǵa, tipti bir jylǵa bokstan shettetýi múmkin. Degenmen, sol sarapshylardyń ishinde komıssııanyń qatań jazasyna senbeıtinder de bar. «5 mamyrda Golovkın-Alvares revanshy mindetti túrde ótedi», - deıdi olar. Degenmen, oǵan deıin Alvares komıssııanyń aldynda ant berip, dopıngti ádeıi paıdalanbaǵanyn dáleldeýi tıis. Ókinishke oraı, «Kanelonyń» únsizdigi qazirgi jaǵdaıdy ýshyqtyryp otyr. Onyń áleýmettik jeliler arqyly Golovkınge qatysty «dúrkin-dúrkin» sózderi bolmasa, dopıngke qatysty eshqandaı túsinikteme berilgen joq. «Saýl Alvares ózine senimdi bolsa, nur ústine nur. Oǵan qosa, boks álemindegi eń tanymal boksshy degen ataǵy bar ǵoı. Degenmen, onyń qazirgi áreketin jankúıerler de, Nevada komıssııasy da menmendik, tákapparlyq dep qabyldaıdy. Eger ol dopıng máselesin ózi túsindire almasa, onda 5 mamyrdaǵy revansh anyq ótpeıdi», - dep jazdy «Los Angeles Times» gazetiniń jýrnalısi Lens Pagmaır. Al Boxingscene.com saıtynyń tilshisi Stıven Edvardstyń oıynsha, Alvarestiń naýryz aıyndaǵy synamalary taza bolyp shyqsa da, bas kezinde «klenbýterol» oǵan jattyǵýǵa jeńil kirisip ketýge kómektesti. Endi, dopıng tabylsa da, tabylmasa da, dál osy tsıklda Golovkınge qarsy dopıngpen jattyǵyp kelgen boksshy shyǵady. Sondyqtan aldaǵy jekpe-jekti keıinge qaldyrý qajet.

 

Árıne, jekpe-jekti ótetinin, ıa ótpeıtinin komıssııanyń ózi anyqtaıdy. Degenmen, qazirdiń ózinde HBO arnasy jarnama berýdi toqtatty. AQSh kınoteatrlary da jarnamany alyp tastady. «Bıletterdi qaıtarýǵa bolady» degen habarlandyrý tarap jatyr. Bálkim, Golovkın óz málimdemesin jasamaǵanda jaǵdaı basqasha bolatyn ba edi? Soǵan qaramastan, GGG barlyǵyna bokstyń bıznesten joǵary turatynyn kórsetti. Sportshy qansha baı bolsa da, barlyǵyna ortaq erejelermen, al, eń bastysy, jankúıerlerdiń oıymen sanasýǵa mindetti ekenin moıyndatty. Árıne, Golovkınniń ózi úshin Alvareske qarsy revanshty erterek ótkizip, naǵyz chempıondy anyqtap alǵan durys. Aqsha jaǵynan da, ýaqyt jaǵynan da sol tıimdi. Degenmen, Gennadıı ádildik jolyn tańdady. Endi, 5 mamyrda revansh ótpeı qalsa, qyrkúıek aıynda eki boksshy naǵyz «Big Drama Show»-dy kórsetedi degen senim bar.