Golovkın-Alvares aıqasyna bıletterdiń satylymynan 30 mln dollar tústi

ASTANA. QazAqparat -  Gennadıı Golovkın (37-0, 33 KO)  men Saýl Alvarestiń (49-1-1, 34 KO) alda bolatyn jekpe-jegin uıymdastyrýshylar bıletterdiń satylymynan ǵana 30 mıllıon dollar tabys tapty, dep habarlaıdy Sports.kz Los Angeles Times jýrnalısi Lens Pagmırge silteme jasap.

Aıta keteıik, baǵasy 300-den 5 000 dollarǵa deıin bolǵan bul aıqastyń bıletteri shilde aıynyń basynda satylyp ketken. Osylaısha, bılet satylymy boıynsha Las-Vegasta ótetin Golovkın - Alvares jekpe-jegi 72,2 mln dollar jınaǵan kishi Floıd Meıvezer (50-0, 27 KO) men Mennı Pakıao (59-7-2, 38 KO) aıqasynan ǵana kem túsip tur.

Meıvezerdiń Alvarespen aıqasyna toqtalar bolsaq, ol jekpe-jektiń bılet satylymynan túsken qarjy 20 mln dollardy quraǵan. Osy parametr boıynsha Golovkın - Alvares aıqasy Meıvezer - Konor jekpe-jeginen artta qalatyn sııaqty. 

Eske salaıyq, 16 qyrkúıekte Gennadıı Golovkın meksıkalyq boksshy Saýl Alvarespen judyryqtasady. Osy jekpe-jekte Alvares GGG-diń tek eki ataǵy - WBA men IBF belbeýleri úshin ǵana talasady. Golovkın utylyp qalsa, onyń taǵy eki belbeýi - WBC men IBO bos qalyp, ony basqa boksshylar ózara sarapqa salady. Al qazaqstandyq boksshy jeńiske jetse, tórt belbeýine taǵy The Ring jýrnalynyń arnaıy belbeýin qosyp alady. Atalǵan basylym ony arnaıy Alvares úshin shyǵarǵan bolatyn.

Ýaqyt aıyrmashylyǵyna baılanysty Qazaqstanda jekpe-jektiń tikeleı kórsetilimi 17 qyrkúıek kúni tańerteń kórsetiledi.