Gollıvýd kınofestıvalinde Qazaq: history of the golden men fılminiń mýzykasy úzdik dep tanyldy

NUR-SULTAN. QazAqparat - QR Mádenıet jáne sport mınıstri Aqtoty Raıymqulova esimi álemge áıgili, kómeımen án salý sheberi Edil Qusaıynovpen kezdesti, dep habarlaıdy QazAqparat vedomstvonyń saıtyna qyzmetine silteme jasap.

Kómeımen án aıtý ónerin ıgerýmen qatar, ol kompozıtor, folklor zertteýshisi jáne qazaqtyń kóptegen mýzykalyq aspabynda, sonyń ishinde jetigen, sybyzǵy, sazsyrnaı, shańqobyz jáne basqa da ishekti shertpeli, sondaı-aq perneli aspaptarda oınaıtyn mýltıaspapshy.

Aqtoty Raıymqulova Edil Qusaıynovty - Gollıvýd kınofestıvalindegi jeńisimen quttyqtady.

«Keshe Los-Andjelesten tamasha jańalyq jetti. Gollıvýd kınofestıvalinde Qazaq history of the golden men fılminiń mýzykasy úzdik dep tanyldy. Bul Qazaqstan Táýelsizdiginiń 30 jyldyǵyna arnalǵan bizdiń syılyǵymyz!»,- dedi Edil Qusaıynov.

Osy baıqaýdyń ár nomınatsııasy boıynsha úzdikterdi kompozıtorlar jáne án avtorlary qoǵamynyń, amerıka televızııa akademııasynyń, ulttyq óner jáne dybys jazý ǵylymy akademııasynyń, kınematografııa óneri jáne ǵylym akademııasynyń mýzykalyq sektsııasy músheleri, avtorlyq quqyqty qorǵaý uıymdarynyń ókilderi, sondaı-aq mýzykatanýshy jýrnalıster men menedjerler anyqtaıdy.

Fılmniń avtorlary - rejısser Igor Lopatenok, teń rejısser - Oskar syılyǵynyń ıegeri Olıver Stoýn, kompozıtor Karl Sılıotto.

Bul fılmniń dybysyn QR eńbek sińirgen qaıratkeri, dırıjer Abzal Muhıtdınovtyń basqarýyndaǵy Astana Opera sımfonııalyq orkestri jazǵan. Fılmniń kompozıtsııasynda Edil Qusaıynov eýropa jáne amerıka tyńdarmandary úshin tyń dúnıe - kómeımen án shyrqaıdy. Kómeımen án aıtý - ejelden kele jatqan óner túri, ol myńdaǵan jyl buryn paıda bolyp, búginge jetip otyr. Ásirese bul túrki halyqtarynyń, sondaı-aq Sibir, Mońǵolııa jáne Tıbette turatyndardyń dástúrli, án aıtý ádisi. Kómeımen án aıtqan kezde dybystardyń terbelisi adamnyń qabyldaýy men áser alý sezimin damytady.

Bul fılmde birneshe stıldiń ishinen arnaıy kómeı stıli iriktep alynǵan.

Edil Qusaıynov fılmde sybyzǵy, sazsyrnaı, shańqobyz aspabynda oınaıdy. Onyń mýzykasyn Erlan Sábıt qobyzda, Málik Dáýitov pen Ábilqaıyr Ábdirashevtiń soqpaly aspaptarda súıemeldeýi erekshe áser beredi.

«Birlesken shyǵarmashylyq jumystyń arqasynda siz osyndaı keremet dúnıeni jasap shyqtyńyz, ony festıvaldiń qazylar alqasy da joǵary baǵalady», - dedi Aqtoty Raıymqulova.

Ol Edil Qusaıynov pen onyń áriptesterine shyǵarmashylyq tabys jáne jańa jetistikter tiledi.