Gollandııalyq kompanııa Qazaqstanǵa eki býksır jasap berdi

AQTAÝ. QazAqparat - Gollandııanyń iri keme jasaýshy uıymy Damen Shipyards Group «Qazteńiztransflot» ulttyq teńiz keme jasaý kompanııasy» JShS úshin eki jańa «Damen Shoalbuster 2709» súıreýshi kemesin jasady. Bul týraly «QazAqparat» HAA tilshisine kompanııa baspasóz qyzmeti habarlady.

Jańa kemeler kompanııaǵa ulttyq flotty qýatty býksırlermen qamtamasyz etý úshin qajet. «Bul býksırler Kaspıı teńiziniń Qazaqstan sektoryndaǵy bolashaq munaı-gaz kenderin ıgerý úshin qajet. Sýǵa batý deńgeıiniń azdyǵy býksırlerge soltústik Kaspııdiń taıaz jerlerinde jumys isteýge múmkindik  beredi. Uzyndyǵy 27 metr, eni 9 metr keletin býksırler soltústik Kaspııdiń taıaz jerlerinde teńiz nysandary men kemelerdi súıreý, kemelerge kómektesý, navıgatsııalyq kómek kórsetý, zákir jınaý jáne óńdeý sııaqty qosalqy kemelerdiń basqa da fýnktsııalaryn atqaratyn bolady», - deıdi kompanııa baspasóz qyzmetindegiler.

Buryn «Qazteńiztransflot» kompanııasynyń baspasóz qyzmeti habarlaǵandaı, úsh býksırdi jasaý jáne satyp alýǵa «Al Hilal Islam banki» AQ qarjy quıyp jatyr.

Úshinshi býksırdiń qurylysy 2018 jyly aıaqtalady dep kútilýde. Bul jaıly úshjaqty kelisimge 2017 jyldyń 4 shildesinde fırma ókilderi Astanada qol qoıǵan bolatyn.