Golden Line Qazaqstanda júk eksporty men tranzıti boıynsha óz qyzmetin keńeıtýge múddeli —Úkimet

<p>ASTANA.KAZINFORM &mdash; QR Premer-Mınıstriniń orynbasary Serik Jumanǵarın Irannyń Golden Line keme qatynasy kompanııasynyń negizin qalaýshy ári prezıdenti Álı Akbar Ehsanımen kezdesti. Bul týraly Úkimettiń baspasóz qyzmeti málimdedi.</p>

Jeke kompanııa taýarlardyń tranzıtimen jáne eksportymen aınalysady, konteınerlik tıeý jáne túsirý, saqtaý qyzmetterin, sondaı-aq Irannyń Kaspıan portynda kólik-logıstıkalyq qyzmetterdiń basqa túrlerin kórsetedi. Búgingi tańda kompanııa Qazaqstannan jáne Ortalyq Azııanyń basqa elderinen, Reseı men Ázerbaıjannan Parsy shyǵanaǵy, Úndi muhıty, Azııa jáne Afrıka elderiniń porttaryna túrli júkterdiń eksporty men tranzıti boıynsha óz qyzmetterin keńeıtýge múddeli.

Foto:Úkimet

Kezdesý barysynda Álı Akbar Ehsanı habarlaǵandaı, jaqynda kompanııanyń negizgi tıeý-túsirý qýattary men kemeleri ornalasqan Kaspıı teńizindegi (Kaspıan) Iran porty Irannyń temirjol jelisine qosyldy, bul Kaspıı men Parsy shyǵanaǵy porttary arasynda tikeleı temirjol baılanysyn qamtamasyz etedi. Sondaı-aq keme qatynasy kompanııasynyń basshysy Bender-Abbas portynda qazaqstandyq termınal qurylysynda yntymaqtastyq ornatýdy usyndy.

Foto: QR Úkimeti

«Bizdiń qolymyzda Bender-Abbas portynda 25 ga konteınerlik alań bar. Sondaı-aq biz porttaǵy qazaqstandyq termınal úshin yńǵaıly jerde taǵy 30 ga bólýge jáne onyń qurylysyna óz ınvestıtsııalarymyzdy salýǵa daıynbyz. Biz Kaspıan portyna júkterdi tikeleı jetkizýdi uıymdastyra alamyz», — dedi Álı Akbar Ehsanı.

Kezdesý qorytyndysy boıynsha Serik Jumanǵarın Golden Line kompanııasynyń basshylyǵyn qazaqstandyq áleýetti áriptestermen kezdesip, jobany talqylaý úshin 20 shildede Aqtaýda ótetin «Soltústik – Ońtústik» birinshi halyqaralyq kólik-logıstıkalyq forýmyna qatysýǵa shaqyrdy.