Ǵızat Nurdáýletov ShYU-ǵa múshe memleketter qaýipsizdik keńesi hatshylarynyń kezdesýine qatysty
Nıý-Delıde Shanhaı Yntymaqtastyq Uıymyna múshe memleketterdiń qaýipsizdik keńesi hatshylarynyń on segizinshi kezdesýi ótti.
Jıynǵa Qazaqstan Respýblıkasy Prezıdentiniń Kómekshisi – Qaýipsizdik Keńesiniń hatshysy Ǵızat Nurdáýletov qatysty.
Іs-shara barysynda ShYU keńistigindegi qaýipsizdik pen turaqtylyqty qamtamasyz etý salasyndaǵy ahýalǵa qatysty birqatar másele talqylandy.
Taraptar halyqaralyq jáne aımaqtyq kún tártibindegi ózekti máseleler, atap aıtqanda, kıberqylmyspen kúres, terrorızm men ekstremızmge, zańsyz qarý men eskirtki aınalymyna, uıymdasqan transulttyq qylmysqa qarsy is-áreket, Aýǵanstandaǵy jaǵdaıdy turaqtandyrý, halyqaralyq aqparattyq qaýipsizdikti qamtamasyz etý salalaryndaǵy ózara yntymaqtastyqty damytý jóninde pikir almasty.
Ǵızat Nurdáýletov áriptesterine ShYU qyzmetiniń mańyzdy baǵyttary boıynsha Qazaqstannyń ustanymy týraly málimet berdi.
Sondaı-aq elimizdiń múddesin eskere otyryp, qaýipsizdiktiń negizgi aspektileri boıynsha ózara is-áreketterdi odan ári damytý jóninde birqatar usynys aıtty.
Jıyn qorytyndysy boıynsha ShYU-ǵa múshe memleketterdiń qaýipsizdik keńesi hatshylarynyń kelesi kezdesýin Qazaqstanda ótkizý jóninde sheshim qabyldandy.
Kezdesý aıasynda Qazaqstan Respýblıkasy Prezıdentiniń Kómekshisi – Qaýipsizdik Keńesiniń hatshysy Ǵızat Nurdáýletov Úndistan Premer-mınıstriniń ulttyq qaýipsizdik jónindegi keńesshisi Adjıt Dovalmen ekijaqty kelissóz júrgizip, ózara yntymaqtastyqtyń ózekti máselelerin talqylady.
Olar eki eldiń qaýipsizdik keńesi apparattary arasyndaǵy keńestiń tórtinshi kezeńin Astanada ótkizý jóninde ýaǵdalasty.