Ǵımarattar búlingen joq — Mınıstr Almatydaǵy jer silkinisi týraly

<p>ASTANA. KAZINFORM — Tótenshe jaǵdaılar mınıstri Syrym Sháriphanov Úkimet otyrysnyda Almatydaǵy túngi jer silkinisiniń aldyn ala málimetterin aıtty.</p>

«Seısmologııalyq baqylaýlar men zertetýler ulttyq ortalyǵynyń deregi boıynsha, 23 qańtar túngi saǵat 0.09-de Almatydan ońtústik-shyǵysqa qaraı 264 shaqyrym jerde, Qytaı Halyq Respýblıkasy men Qyrǵyz Respýblıkasy shekarasynda jer silkinisi tirkeldi. Tańǵy saǵat 7.00-degi jaǵdaı boıynsha 3 eleýli seısmıkalyq jaǵdaı tirkelgen. Almaty qalasyndaǵy maksımaldy sezilýi — 5 ball, Shymkent qalasynda, Jambyl oblysynda 2-3 ball, Jetisý oblysynda boldy. Aldyn ala málimet boıynsha búlingen ǵımarattar men qurylystar bolǵan joq», — dedi Syrym Sháriphanov.

Eske salaıyq, búgin, qańtardyń 22-sinen 23-ine qaraǵan túni Almatyda birneshe tolqynmen jer silkindi.

Resmı málimet boıynsha alǵashqy dúmpýdiń amplıtýdasy 5 ballǵa deıin jetken. Saldarynan úreı boı aldyrǵan turǵyndardyń bir bóligi qalany tastap shyǵýǵa bekingen.

Munyń arty kólik keptelisine ulasyp, janarmaı beketterinde kezek paıda bolǵan.

Halyq arasyndaǵy baıbalamdy paıdalanyp taksı baǵasyn birneshe ese kóterip jiberý faktileri de tirkeldi.  

Epıtsentri Almatydan ońtústik-shyǵysqa qaraı 264 shaqyrym jerde, Qyrǵyzstan men Qytaı shekarasynda ornalasqan túngi jer silkinisi Almaty men Shymkentten bólek, Astanada jáne Qazaqstannyń bes oblysynda sezilgen.

Jer silkinisi kezinde Almaty qalasynda 8 adam zardap shekti, bir turǵynnyń jaǵdaıy aýyr.

Jaraqat alǵan úsh adam turǵyn úılerdiń 2 jáne 3 qabatynan sekirgen.

24-25 qańtar kúnderi Prezıdent Qasym-Jomart Toqaev Almatyǵa barady.

Ulttyq seısmologııalyq baqylaýlar men zertteýler ǵylymı ortalyǵynyń dırektory Dáýlet Sársenbaev Almatyda jaqyn ýaqytta joıqyn jer silkinisi bolmaıtynyn aıtty.