Gımalaı, bizdi kút: Evereske úsh ret shyqqan Maqsut Jumaev Qazaqstan alpınısteriniń jospary týraly
Aıtýynsha, ǵalamsharda Everest shyńyna uqsaıtyn taý joq.
«Everest qatelikterdi keshirmeıdi. Onda ómir men ólim aldynda turasyń. Jaman oılarǵa jol bermeýge tyrysqanmen, boıyńdaǵy alańdaýshylyq pen qorqynyshtan aryla almaısyń. Jaǵdaıdy kóbine aýa raıy sheshedi. Munda jyl saıyn alpınıster men týrıster óledi. Everest shyńynda jalǵyz básekelestik – qarly boran, aıaz. Everestti baǵyndyrýǵa shyqqan barlyq alpınıst qudiretti Jaratýshydan aýa raıynyń ashyq, jelsiz bolýyn tileıdi»,- deıdi ol.
Maqsut Jumaev bul ekspedıtsııany Rahymjan Qoshqarbaev pen Álııa Moldaǵulovanyń 100 jyldyǵyna arnaǵandaryn atap ótti.
«Biz ekspedıtsııamyzdy Qazaqstannyń birtýar batyrlary – Qazaqstan Respýblıkasynyń birinshi qorǵanys mınıstri, Halyq qaharmany Saǵadat Nurmaǵambetov, Halyq qaharmany Rahymjan Qoshqarbaev pen Keńes Odaǵynyń batyry Álııa Moldaǵulovanyń 100 jyldyǵyna arnadyq. Shyńda biz eki týdy da kóterdik – elimizdiń týy jáne Rahymjan Qoshqarbaevtyń Jeńis týyn. Meni alǵashqy joryqtaryma daıyndaǵan ustazym ári tálimgerim Ervand Tıhonovıch Ilınskııdi árdaıym eske alamyn, ol árqashan tárbıelenýshilerine janashyr, biraq talapshyl bolatyn. Bul joryqta men Anar men Almırden bir sátke de kúmándanbadym jáne meniń mansabymdaǵy eń bıik shyńǵa úshinshi kóterilýimde elimizdiń týlaryn olarmen birge Everest shyńynda jelbiretkenimizge qýanyshtymyn», – deıdi qazaqstandyq alpınıst.
Sondaı-aq, ol Everest shyńyn baǵyndyrǵan tuńǵysh qazaq qyzy- Anar Býrashevanyń qaısarlyǵyna toqtaldy.
«Anar Maratqyzy Býrasheva óziniń ustanymymen, qaısarlyǵymen barsha qazaqstandyqtarǵa batyrlardyń aramyzda júrgenin úlgi etti. Bul jastardyń alǵa qoıǵan maqsattaryna jetýine úlken motıvatsııa. Ol úshin jáne ekspedıtsııanyń barlyq basqa múshesi úshin bul qıyn mindet boldy, olar ony abyroımen atqardy. Naǵyz batyrlar. Anar Býrasheva men Almır Qymbatbaıulyna barlyq qurmet pen madaqqa laıyq. Everest shyńyna shyqqan saıyn ártúrli jaǵdaıǵa tap bolasyń. Bul joly da qaıǵyly oqıǵalardyń kýási boldyq. Ókinishke oraı, eshkim de budan qorǵalmaǵan»,- dedi «Kazakh Everest Team» ulttyq-patrıottyq ekspedıtsııasynyń jetekshisi.
Maqsut Jumaev aldaǵy josparlarymen de bólisti.
«Alda úlken josparlar bar. Biz Ulttyq Olımpıada komıtetimen belsendi yntymaqtastyqtamyz. Olımpıada kezinde sportshylarymyzǵa qoldaý kórsetý úshin Monblan shyńyna (Frantsııanyń eń bıik taýy) kóteriletin shyǵarmyz. Bul oraıda Qazaqstan UOK basshysy Gennadıı Golovkın bizdi qoldaıdy dep oılaımyn. Qyrkúıek aıynda elimizde dúnıejúzilik kóshpendiler oıyndary aıasynda keshendi jarystar ótedi. Aldaǵy kúzde biz órleýdi osy aýqymdy sharaǵa arnaıtynymyzdy joqqa shyǵarmaımyn. Men segiz myńǵa kóterilýdi uıymdastyrýǵa tyrysamyn. Ekspedıtsııa ottegisiz klassıkalyq stılde ótedi. Gımalaı, bizdi kút, biz jaqyn arada bolamyz. Álbette, keıbir qabiletti jigitter bizben birge barady. Jalpy, osy joly Anar Býrashevanyń gıd qyzmetin atqarǵanyn qalaımyn. Onyń tájirıbesi bar. Sondyqtan mansabty aıaqtaý týraly áńgime bolýy múmkin emes. Taýǵa ǵashyq bolǵan adam, taýsyz ómir súre almaıdy»,- deıdi ol.
Sóz sońynda Maqsut Jumaev, shyńdy baǵyndyrý – fızıkalyq jáne psıhıkalyq turǵydan qıyn sharýa. Kóterilý qandaı jınaqylyq pen batyldyqty talap etse, shyńnan túsý de dál sondaı tabandylyqty talap etetinin jetkizdi.
Buǵan deıin Everesti baǵyndyrǵan qazaqstandyq alpınısterge páter berilgeni týraly jazǵan edik.
Eske salaıyq, qazaqstandyq alpınıster elge 20 mamyrda oralǵan bolatyn.
Sondaı-aq qazaq qyzy tuńǵysh ret Everest shyńyna shyqqany týraly jazǵan bolatynbyz.