Prezıdent: Ǵylymmen aınalysyp júrgen jastardyń sany kóbeıip keledi

<p>ASTANA. KAZINFORM - Memleket ǵylymǵa bóletin qarajattyń kólemin aldaǵy ýaqytta da arttyra túsedi. Bul týraly Memleket basshysy Ǵylym jáne tehnologııalar jónindegi ulttyq keńestiń otyrysynda aıtty.&nbsp;</p>

«Byltyr ǵylymǵa úsh jyldyń ishinde 625 mıllıard teńge qarjy bólý týraly sheshim qabyldandy. Memleket aldaǵy ýaqytta da bul qarajattyń kólemin kóbeıte beredi. Qazir ǵalymdardyń jalaqysy eki ese kóbeıdi. Ozyq ǵylymı-zertteý ınfraqurylymyn qalyptastyrýǵa qomaqty qarjy bólinip jatyr. Doktorantýrada oqýǵa arnalǵan bilim granttarynyń sany artty. Ǵalymdarǵa álemniń ozyq ǵylymı ortalyqtarynda tájirıbeden ótý úshin zor múmkindik berilip otyr. Jas zertteýshilerdi qoldaý sharalary kúsheıtildi. Sonyń nátıjesinde ǵylymmen aınalysyp júrgen jastardyń sany kóbeıip keledi. Aımaqtarda sheteldiń jetekshi ýnıversıtetteriniń fılıaldary ashyldy. Biraq bul sharalarmen shektelip qalýǵa bolmaıdy. Elimiz turaqty damýy úshin ózgeristerge tez beıimdelip, tyń múmkindikterdi utymdy paıdalaný óte mańyzdy. Bul – strategııalyq mindet. Osy oraıda memleket ǵalymdarǵa, sarapshylarǵa, el ekonomıkasyna jańashyldyq ákeletin mamandarǵa zor úmit artady. Olarǵa aıryqsha mıssııa júkteledi. Sol úshin de ǵylymı áleýetimizdi nyǵaıta beremiz», - dedi Prezıdent.