Ǵylymdy kommertsııalandyrý: keıingi jyldary qandaı jetistikter bar

<p>ASTANA. KAZINFORM &mdash; Ǵylym jáne joǵary bilim mınıstrligi ǵylymdy kommertsııalandyrý salasynda bıyl elimizde qandaı jetistikter bolǵanyn túsindirdi.</p>

— Ǵylym qory 2016 jyldan bastap ǵylymı nemese ǵylymı-tehnıkalyq qyzmet nátıjelerin (ǴǴTQN) kommertsııalandyrý jobalaryn grant aıasynda qarjylandyrýǵa konkýrstar ótkizip keledi. Jalpy, 2016, 2017, 2018, 2022, 2023 jáne 2024 jyldary 6 konkýrs ótkizildi, olarǵa 2148 ótinim berildi, 1681-i saraptamadan ótti, 416-sy ulttyq ǵylymı keńes (UǴK) sheshimimen maquldandy, 386 shart jasaldy. Bul rette iske asyrý kezeńinde 208 joba tur, 180-den astam óndiris satylymǵa shyqty, onyń ishinde 19 joba eksportqa shyqty. Satylym kólemi 1 mlrd teńgeden asqan 7 joba tirkeldi, — dep atalyp ótken Ǵylym mınıstrliginiń Kazinform agenttigine bergen jaýabynda.

Vedomstvo aqparatyna qaraǵanda, ǵylymı-tehnıkalyq damýǵa jobalardyń qosqan jalpy úlesi 91 mlrd teńgeni qurady. Onyń ishinde satylym, birlesip qarjylandyrý, salyq tólemderi, satyp alynǵan jabdyqtar jáne tólengen roıaltı kólemderi bar. Bıýdjetke salyq tólemderi túrinde 9 mlrd teńge tólendi. Sonymen qatar, jeke qarjylandyrý kólemi shamamen 14,5 mlrd teńgeni qurady. 2000-nan astam adam jumys oryndarymen qamtamasyz etildi. Satýdan túsken tabys 39,3 mlrd teńgeni qurady. 673 mln teńge somasyna roıaltı tólendi.

— 2024 jylǵy 3 qyrkúıekte 2025-2027 jyldarǵa arnalǵan ǵylymı nemese ǵylymı-tehnıkalyq qyzmet nátıjelerin kommertsııalandyrýdyń neǵurlym perspektıvaly jobalaryn grant aıasynda qarjylandyrýǵa konkýrs jarııalandy. Ótinimderdi qabyldaý 2024 jyldyń 23 qazanyna deıin sozyldy, 439 ótinim berildi. Ǵylymı-tehnıkalyq saraptama ortalyǵy konkýrstyq rásimderdi ótkizedi, — delingen mınıstrlik málimetinde.

Budan buryn habarlanǵandaı, Qazaqstan jáne Ulybrıtanııa ǵylymı ázirlemelerdi kommertsııalandyrý, sondaı-aq ınnovatsııalardy yntalandyrý baǵytynda yntymaqtastyq qurmaq.