Ǵylym mınıstrligi talapkerler eń kóp qujat tapsyratyn JOO-lardy atady

<p>ASTANA. KAZINFORM &ndash; Ǵylym jáne joǵary bilim mınıstrligi Kazinform saýalyna joldaǵan jaýabynda talapkerler eń kóp qujat tapsyratyn joǵary oqý oryndaryn atady.</p>

Vedomstvonyń deregi boıynsha, respýblıkada 120 JOO jumys istep tur. Onyń 11-i ulttyq, 29-y memlekettik, 14-i azamattyq emes (áskerı, quqyq qorǵaý mamandaryn daıarlaıtyn) 1-ýi avtonomdy, 1-ýi halyqaralyq, 16-sy aktsıonerlengen, 48-i jeke menshik.

«Búginde Astana, Almaty, Shymkent sııaqty iri qalalarda ornalasqan tanymal joǵary oqý oryndarynyń tizimi ózgerissiz qalyp otyr. Onyń ishinde ál-Farabı atyndaǵy QazUÝ, Abaı atyndaǵy QazUPÝ, L.Gýmelev atyndaǵy EUÝ jáne ózgeleri bar», - dep jazylǵan jaýapta.

Óńirlik joǵary oqý oryndarynyń ishinde sheteldik ýnıversıtetterdiń fılıaldary ashylǵan uıymdardyń bási joǵary ekeni de aıtylǵan.

«Strategııalyq seriktestik aıasynda barlyq óńir oqý oryndarynda jetekshi sheteldik JOO-lardyń fılıaldary ashylyp jatyr. Olardyń bári jastardyń úlken qyzyǵýshylyǵyn týdyryp otyr. Mysaly, byltyr M.Qozybaev atyndaǵy Soltústik Qazaqstan memlekettik ýnıversıtetiniń bazasynda ashylǵan Arızona ýnıversıtetiniń fılıalyna 18 óńirden talapkerler kelip tústi», - deıdi mınıstrliktegiler.