Gıdrometeorologııalyq ahýal: Keı ózenderde sý qory jyldaǵydan mol
Kúntizbe boıynsha kóktem kelgenimen, qystyń yzǵary kete qoıǵan joq. Keıbir óńirde áli kúnge deıin qar jaýyp, jerdiń tońy jibimeı tur.
Belgili bolǵandaı, jazyqtaǵy ózenderde ylǵal qory birkelki mólsherde taralmaı jatyr.
Máselen, Qaraǵandy jáne Ulytaý oblystaryndaǵy Nura jáne Sherýbaınura ózen alaptarynda ylǵal 27 jáne 52%-ǵa azaısa, Aqmola jáne Soltústik Qazaqstan oblystaryndaǵy Esil ózeni alabyna kelip kuıatyn Qalqutan ózeni alabynda 12%-ǵa tómendegen. Al Jabaı, Sileti, Shaǵalaly ózen alaptarynda jáne Sergeev sý qoımasyna deıingi aralyqta tıisinshe 28-den 60%-ǵa deıin ulǵaıǵan.
«Aqtóbe oblysyndaǵy Іlek jáne Qarǵaly ózen alaptarynda ylǵal qory 4 jáne 15%-ǵa ulǵaıdy. Batys Qazaqstan oblysyndaǵy Shyńǵyrlaý ózen alabynda ortasha kópjyldyq kórsetkishterdiń sheginde, Shejin-2 ózen alabynda 28%-ǵa azaıdy. Derkól jáne Shaǵan ózen alaptarynda 67 jáne 41%-ǵa ulǵaıdy. Qostanaı oblysyndaǵy Joǵarǵy Tobyl sý qoımasynan joǵary jatqan ózen alaptarynda 16%-ǵa, al Qaratomar sý qoımasyna kelip quıatyn toraby alabynda 51%-ǵa azaıdy», – dedi Serik Saırov.
Taýly ózender alaptaryndaǵy jaǵdaıǵa toqtalatyn bolsaq, Shyǵys Qazaqstan jáne Abaı oblystaryndaǵy Ertistiń oń jaǵalaýyndaǵy ózen alaptaryndaǵy sý kólemi ortasha kópjyldyq kórsetkishterden 69%-ǵa, Buqtyrma sý qoımasy aımaǵynda 100%-ǵa, Ertistiń sol jaǵalaýyndaǵy ózen alaptarynda 41%-ǵa joǵary, al Tarbaǵataı jotasynyń ońtústik-batys betkeıindegi ózen alaptarynda ortasha jyldyq kórsetkishterdiń shamasynda tur.
«Qazgıdromet» mamandarynyń boljamy boıynsha, naýryz aıynyń sońyna qaraı kún jylynyp, sáıkesinshe qardyń qarqyndy erýi sý basý qaýpin týdyrady. Bul rette, Reseı Federatsııasymen shekaralas aımaqtarǵa, atap aıtqanda Jaıyq ózeni men onyń salalary jáne Tobyldyń alaptaryna erekshe nazar aýdarý qajet.
Rosgıdromettiń málimeti boıynsha, búginde jınalǵan qar kólemi saldarynan Orynbor jáne Chelıabi oblystarynda, sondaı-aq Bashqurtstan Respýblıkasynda qolaısyz sý tasqyny jaǵdaıy qalyptasyp otyr.