GGG VS Canelo: Trılogııanyń kýágeri bolamyz ba

ASTANA. QazAqparat - Búgin AQSh-tyń Las-Vegas qalasynda ótken jekpe-jekte qazaqstandyq boksshy Gennadıı Golovkın men meksıkalyq Saýl Alvares teń tústi. Aldaǵy ýaqytta eki boksshy da revansh ótkizýge ázir. Alaıda buǵan deıin "Kanelonyń" promoýteri Oskar De La Hoııa "GGG-Canelo" teketiresin trılogııaǵa, ıaǵnı úsh jekpe-jekke deıin sozýǵa laıyqty ekenin aıtqan bolatyn, dep xabarlaıdy QazAqparat tilshisi.

"Kim biledi, bálkim, osy jekpe-jekten keıin taǵy bir aıqasty uıymdastyramyz. Bul teketires trılogııaǵa suranyp tur. Moxammed Álı men Djo Freızer, Marko Antonıo Barrera men Erık Morales - bunyń barlyǵy tarıxta uly trılogııalar bolyp qaldy. Naǵyz boks degen osy", - degen bolatyn De La Hoıa eki aı buryn bergen bir suxbatynda.

Aıta ketken jón, osy jolǵy jekpe-jekti uıymdastyrýymen tolyǵymen Alvarestiń jaǵy aınalysty. GGG-diń promoýteri - Tom Lefler bul jumysqa qatysqan joq. Ekijaqty kelisimniń sharty solaı boldy.

Al amerıkalyq bapker Robert Garsııa birden «Golovkın - Alvares» jekpe-jeginiń bir ǵana kezdesýmen shektelmeıtinine boljam jasaǵan bolatyn. "Bálkim, arǵy jaǵy trılogııaǵa ulasýy ábden múmkin. Al osy trılogııadan keıin GGG zeınetke shyqsa da bolady. Sebebi ol qyrýar tabysqa qol jetkize alady. "Kanelo" óz jolyn jalǵastyrady. GGG bolsa, qaltasyna 30 mıllıondy salyp alyp, bokspen qoshtasa alady. Kim biledi, bálkim odan da kóp aqsha tabatyn shyǵar», - dedi Garsııa.