GGG ýkraındyq boksshy Derevıanchekodan qashyp júr me
Sheteldik buqaralyq aqparat quraldarynyń málimetine sáıkes, basqa uıymdar kútýge ázir. Alaıda IBF kelesi jekpe-jekti ýkraındyq boksshyǵa qarsy ótkizýdi talap etip otyr. "IBF óz ustanymyn ózgertetin emes. Olar úshin bir ǵana jol bar. Golovkın ýkraındyq boksshy Sergeı Derevıanchenkomen judyryqtasýy qajet. Negizi, qazir jalǵyz IBF qana óz erejelerin saqtap keledi. Qarapaıym tilmen aıtsaq, Golovkın ne judyryqtasýy tıis, ne belbeýden bas tartýy qajet", - dep jazdy Yahoo! Sports saıtynyń jýrnalısi Krıs Mennıks óziniń tvıtterdegi paraqshasynda.
Buǵan deıin Gennadıı Golovkınniń promoýteri Tom Leffler de osy máselege qatysty túsinikteme bergen bolatyn. Onyń aıtýynsha, GGG ýkraındyq boksshymen judyryqtasýǵa qarsy emes. Biraq ondaı qarsylasqa qatysty jekpe-jekti jan-jaqty jarnamalaý qajet. Al 5 mamyrǵa deıin ýaqyt tyǵyz. Sol sebepti T.Leffler IBF-ten tıtýldy qorǵaýdy keıinge shegerýdi surap otyr. "Negizi, bul jekpe-jekti jarnamalaýǵa ýaqyt tym az. Ondaı jaǵdaıda chempıon da, úmitker de kóp tabys taba almaıdy. Derevıanchenkoǵa qarsy jekpe-jekti Madison Square Garden-de uıymdastyrýǵa ábden bolady. Biraq ol úshin sál kúte turý qajet. Golovkın eshkimnen qashqan emes, qashpaıdy da. Eger Devıanchenkoǵa qarsy shyǵatyn bolsaq, ol jekpe-jekti tıisti deńgeıde uıymdastyrý qajet. Bárin durystap turyp josparlap, jarnamasyn jasaǵan durys. Sonda eki boksshy da jaqsy gonorar alady", - deıdi T.Leffler. Ázirshe, IBF te, Derevıanchenkonyń promoýteri Lý Dı Bella da kelispeı otyr. Olar 5 mamyrda jekpe-jek ótkizýdi talap etip jatyr.
Aıta keteıik, buǵan deıin Nevada shtatynyń atletıkalyq komıssııasy Golovkınge aldaǵy jekpe-jekte Vanes Martırosıanǵa (36-3-1, 21 KO) qarsy ótkizýge ruqsat berdi. Oǵan WBC men WBA de kelisti. Alaıda IBF qarsylyq bildirip, mindetti úmitkermen shyǵýdy talap etti.
Foto: prosports.kz