GGG men «Kanelo» arasynda úshinshi jekpe-jek ótýi múmkin

ASTANA. QazAqparat - Ortasha salmaq dárejesi boıynsha Álem chempıony Gennadıı Golovkınniń promoýteri Tom Leffler qazaqstandyq boksshy aldaǵy Saýl Alvareske qarsy rematch qarjylyq turǵydan tıimdi bolǵandyqtan, ony ótkizýge keliskenin moıyndady. Sondaı-aq, boksshylar úshinshi márte rıngke shyǵýy múmkin ekenin de jetkizdi, dep habarlaıdy Sports.kz.

Leffler boksshylar arasynda úshinshi jekpe-jek ótýi múmkin ekenin aıtty. Alaıda buǵan 15 qyrkúıekte ótetin qarymta kezdesýdiń merziminen buryn nokaýtpen aıaqtalýy kedergi keltirýi múmkin.

«Osynshama aqsha tabý úshin bizge «Kanelo» qajet. Eger odan da tanymal boksshy tabylǵanda, áńgime basqasha bolar edi. Al «Kanelonyń» joly boldy, ol Kotto men Chaveske kezdesti. Ol úshin endi Golovkınnen myqty boksshy joq.

Gennadıı úshin de Saýldan artyq boksshy tabyla qoımas. Sondyqtan, bul aıqas qyrkúıekke josparlanbaǵannyń ózinde keleshekte óter edi. Alaıda jekpe-jektiń kúni belgilenip otyr, sondyqtan barlyǵy onyń ótkizilý barysyna baılanysty bolady. Úshinshi kezdesý bolýy múmkin, alaıda 15 qyrkúıektegi jekpe-jek nokaýtpen aıaqtalatyn bolsa, rematchtyń bolýy ekitalaı», - dedi T. Leffler.