GGG-Kanelo: Úshinshi jekpe-jek kimge tıimdi
Gennadıı Golovkın Saýl Alvaresti jeńdi me?
Qazaqstandyq boksshy úshin Saýl Alvares kásipqoı mansabyndaǵy eń myqty qarsylas ekenin bári biledi.
«GGG» VS «Canelo» alǵashqy jekpe-jegi uzaq kelissózderden keıin 2017 jyldyń 16 qyrkúıeginde Las-Vegas qalasynda ótti. Kezdesý qorytyndysynda, eki boksshy tóreshilerdiń sheshimimen teń tarqasty (110-118,115-113,114-114).
Jekpe jekten keıin, eki boksshy da rıngte turyp tóreshiler sheshimine kelispeıtinin aıtty. «Canelo» ekinshi jekpe-jekke shyǵatynyn málim etse, «GGG» chempıondyq ataqtaryn qorǵap qalǵanyna qýandy.
Jekpe-jek qorytyndysy kóp daý týǵyzdy. Boks jankúıerleri, boks sarapshylary jáne tanymal boksshylar qazaqstandyq boksshynyń aıqyn basymdyqpen jeńiske jetti degen pikir bildirgen edi.
Aýyr salmaqta tanymal chempıon Lenoks Lıýıs Twitter paraqshasynda aıqas jaıly bylaı deıdi:
«Menińshe, Golovkın taza jeńdi. Alvarestiń aıaǵyna deıin shydaǵany unady. Negizi, tóreshiler kúlkili sheshim shyǵardy. Eki boksshy da baryn saldy. Alaıda, teń túsetindeı eshteńe bolǵan joq».
Sondaı-aq, Djordj Forman, Mennı Pakıao, Devon Aleksandr syndy aǵa býyn boksshylar jáne Sergeı Kovalev, Terens Kroýford jáne Bıllı Djo Sonders sııaqty álem chempıondary Golovkınniń jeńgenine shák keltirmeıdi. Olardyń pikirine súıensek, «GGG»-ǵa qııanat jasalǵan.
Statıstıka málimetine júginsek, Golovkın bul jekpe-jekte qarsylasyna 703 soqqy jasap, sonyń 218-in dál tıgizgen. Al Alvaresdiń jasaǵan 505 soqqysynyń 169-y dóp tıgen.
Kópke sozylǵan daý-damaı, dopıng oqıǵasy jáne kelissózderden keıin, «GGG» VS «Canelo» II qarymta jekpe-jegi bıyl 16 qyrkúıek kúni taǵy Las-Vegas qalasyndaǵy T-mobile arenasynda ótti.
12 raýndtyq judyryqtasýdan keıin, tóreshiler Saýl Alvaresti jeńiske laıyq dep baǵalady (115-113,114-114,115-113). Osylaısha, Gennadıı Golovkınniń orta salmaqtaǵy uzaq jyldarǵa sozylǵan ústemdigi aıaqtaldy. Alaıda tóreshilerdiń sheshimi tóńiregindegi boks súıer qaýymnyń pikiri ekige jarylyp, Alvarestiń jeńisi taǵy da kúmán týdyrdy.
Qarymta kezdesý Alvarestiń batyl qımyly jáne Golovkındi tyǵyryqqa tireýimen erekshelendi. Bul joly biz ózgeshe «Kaneloǵa» kýá boldyq jáne alǵash ret «GGG»-nyń artqa shegingenin baıqadyq. Deı turǵanmen, otandasymyz soqqy jasaý jáne belsendilik jaǵynan báseńdegen joq. Kerisinshe kóbirek soqqysyn dál baǵyttap, jeńiske degen umtylysyn kórsetti. Al «Kanelonyń» aldyǵa umtylýy, jyldamdyǵy jáne aýyr soqqyǵa tózimdiligi tóreshilerdiń oń baǵasyn alǵan syńaıly.
Resmı statıstıkaǵa súıensek, Golovkın 12 raýndta 879 judyryq siltep, onyń 234-in dál tıgizgen (26.6%). Al Alvares 622 judyryq siltep, onyń 202-sin darytqan (32.5%). Árıne, bul statıstıka jekpe-jek taǵdyryn sheshpegenimen, «GGG»-nyń basymdyǵyn dáleldeı alady.
Oryndalmaǵan arman...
Saýl Alvares orta salmaqqa kelerden buryn, Gennadıı Golovkın bul salmaqta teńdessiz chempıon edi. Onyń basty maqsaty chempıondyq ataqtaryn qorǵaý sany boıynsha jańa rekord ornatý jáne orta salmaqtaǵy barlyq boks uıymdarynyń (WBC,WBA,IBO,IBF jáne WBO) chempıondyq beldikterin biriktirý bolatyn.
Alvarestiń dopıng daýynan keıin Gennadıı Golovkın armenııalyq Vanes Martırosıandy (36-3-1, 21 KO) jeńip, Bernard Hopkınstyń rekordyn qaıtalady. «Kanelomen» ekinshi kezdesý, otandasymyzǵa boks tarıhynda jańa rekord qaldyrýǵa múmkindik bermedi.
Sonymen qatar, Gennadıı Golovkın «Kanelomen» ekinshi jekpe-jek ótkizý úshin mindetti qarsylasy Sergeı Derevıanchenkomen (12-0-0,10KO) judyryqtasýdan bas tartyp, IBF-tyń chempıondyq beldiginen aıyryldy. Sondaı-aq, ol WBO beldigi úshin jekpe-jekti de keıinge qaldyryp keldi. Qazaqstandyq boksshynyń orta salmaqty tolyqtaı baǵyndyrýyna tek WBO chempıondyq beldigi ǵana jetispegen bolatyn.
«GGG»-dyń bolashaǵy ne bolmaq?
Alvarespen eki jekpe-jek Golovkınniń kásipqoı bokstaǵy mansabynda eń úlken aqshalaı tabys tabýyna múmkindik berdi. Árıne, bul chempıondyq ataqtardan mańyzdy emes. Sebebi, «Ǵasyr jekpe-jeginiń» jeńimpazy búgingi kúnniń eń myqty boksshysy atanatyn edi.
Jeńiske jetken «Canelo» bul kúnderi ataq-abyroıy burynǵydan eselene túsip, boks álemindegi eń qymbat sportshylardyń birine aınalyp úlgerdi. Sondaı-aq, bul jeńis oǵan aldaǵy josparlaryn erkin qurýǵa jáne úlken tabys tabýyna jol ashty. Sebebi, meksıkalyq nebári 28 jasta ekenin eskersek, ol alda taǵy basqa salmaqtardy baǵyndyrýdy josparlap otyr.
«GGG» bıyl 36 jasta. Bul boks úshin aıtarlyqtaı úlken jas dep aıtýǵa bolady. Al úshinshi jekpe-jektiń bolý-bolmaýyn Alvarestiń sheshetini belgili. Shyndap kelgende, «GGG»-dyń aldaǵy jospary «Kanelomen» tyǵyz baılanysty bolyp otyr.
Bul kúnde otandasymyz áli de eń tanymal boksshylar qatarynda. Sonymen qatar, orta salmaqta áli úsh chempıondyq beldik bar. Jekpe-jekten keıin Alvares IBO beldiginen bas tartqan bolatyn. Jaqynda brıtandyq Bıllı Djo Sonders dopıng daýynan keıin WBO beldiginen aıyryldy. Sondaı-aq, «GGG-den» jeńilgen Denıel Djeıkobs (34-2-0,29KO) Derevıanchenkomen IBF beldigin sarapqa salmaqshy. Golovkınniń jeńimpazben chempıondyq ataqqa talasý múmkindigi bar.
Alvarespen úshinshi ret aıqasý kerek pe?
WBC uıymy jaqynda Alvareske bir jekpe-jekti erkin ótkizýine ruqsat berip, Jermall Charlony (27-0, 21 KO) Golovkınniń mindetti qarsylasy retinde bekitti. Al boksshynyń menedjeri Tom Leffler kelesi qarsylas retinde WBA turaqty chempıony Rıota Mýratany (14-1, 11 KO) qarastyryp otyrǵanyn aıtty. Alaıda, bul eki jekpe-jekte eks-álem chempıony úshin tıimdi emes.
Sebebi, Golovkın mindetti qarsylastardy jeńgenimen, Alvarestiń úshinshi jekpe-jekke kelisim berý-bermeýi ekitalaı. Onyń sharttary otandasymyzǵa tıimsiz bolary anyq, sondaı-aq ol úshin «GGG» taǵy ýaqytyn sarp etip, birneshe jekpe-jekti artyq ótkizedi.
Buǵan deıin habarlaǵanymyzdaı, qazaqstandyq boksshy Danııar Eleýsinovtiń promoýteri Eddı Hırn basqaratyn DAZN strımıngtik qyzmeti Gennadıı Golovkındi qataryna qosýdy qalaıtynyn aıtqan edi. Alaıda, meksıkalyq «Canelo» taǵy erte qımyldap, DAZN qyzmetimen aldaǵy 11 jekpe-jekke 365 mıllıon dollarlyq kelisim jasasyp úlgerdi. Eger «GGG» DAZN qyzmeti qataryna qosylmasa, úshinshi jekpe-jekke aıtarlyqtaı kedergi keleri anyq. Al DAZN qyzmeti endi qazaqstandyqqa jaqsy qarjylaı kelisim usynýyna kóz jetkize almaımyz. Demek, «Canelo» úshinshi jekpe-jekke barynsha kedergiler jasap baǵady.
Saıyp kelgende Alvarespen úshinshi jekpe-jekte Golovkın barlyq jaǵynan basymdyqqa ıe bola almaı otyr. Aldyńǵy eki kezdesý munyń aıqyn dáleli. Sondyqtan, Djeıkobs pen Derevıanchenko jeńimpazy oǵan qaıta orta salmaqtyń chempıony atanýǵa múmkindik beredi. Sondaı-aq, «GGG» qaıta chempıon atansa, basqa salmaqty baǵyndyrýǵa ne bolmasa úshinshi jekpe-jekte basymdyq alýyna alǵyshart jasalady. Árıne, chempıon retinde sporttyq mansabyn aıaqtaý aıtarlyqtaı abyroı ekeni sózsiz.