«GGG-Kanelo» trılogııasyna núkte qoıyldy – Golovkın bokstan ketpeıdi
Sonymen Las-Vegastaǵy T-Mobile Arena stadıonynda Gennadıı Golovkın men Saýl Alvares arasyndaǵy 12 raýndtyq boks jekpe-jegi aıaqtaldy.
«GGG-Kanelo» trılogııasynyń anderkardyndaǵy 7 jekpe-jektiń birinde qazaqstandyq Álı Ahmedov jeńiske jetip, ekinshi orta salmaqtaǵy IBF NA jáne WBC Silver tujyrymdary boıynsha chemıpon atandy.
Kásipqoı boksta buǵan deıingi 26 kezdesýiniń 15-inde jeńilgen amerıkalyq Gabrıel Rosado Álı Ahmedovke qarsy aıtarlyqtaı sátti óner kórsetti deýge bolady. 10 raýndqa sozylǵan aıqasta qazaqstandyq boksshy barlyq raýndtyń qorytyndysy boıynsha jeńiske jetti.
Aıta keteıik, «GGG-Kanelo» trılogııasynyń anderkardyna birinshi bolyp amerıkalyq Entonı Errera (2-0-1) men Delvın Makkınlı (4-3-1) shyqqan bolatyn. Asa jeńil salmaqtaǵy kezdesý Makkınlı kózinen alǵan jaraqatyna baılanysty, merziminen buryn aıaqtaldy.
Taǵy bir amerıkalyq boksshy Aaron Aponte (6-0, 2 KO) meksıkalyq Fernando Molınanyń (8-0, 3 KO) birinshi orta salmaqtaǵy jekpe-jegi teń aıaqtaldy.
Al jeńil salmaqtaǵy amerıkalyq Mark Kastro (7-0, 5 KO) taǵy bir meksıkalyq Kevın Mendosany (6-1-2, 3 KO) besinshi raýndta jeńip ketti.
Taǵy bir amerıkalyq boksshy Dıego Pacheko (15-0, 12 KO) pýertorıkalyq Enrıke Kolıasony (16-2-1, 11 KO)10 raýndtyq jekpe-jektiń 5 raýndynda nokdaýnǵa jiberip, artynsha tóreshi aıqasty toqtatty.
Osylaısha Dıego Pacheko sýper orta salmaqtaǵy WBC tıtýlyn jeńip aldy.
Orta salmaqta ótken taǵy bir jekpe-jek Ostın Ýılııams (11:0:0) qarsylasy Kıeron Konýeıden (18:2:1) basym tústi.
Al boks jankúıerleri, sonyń ishinde Golovkınniń jaqtastary asyǵa kútken úshinshi aıqastyń aldynda Dımash Qudaıbergen Qazaqstan ánuranyn shyrqap, jınalǵan jurtty bir jelpintip tastady.
Kezdesýdiń alǵashqy raýndarynan-aq meksıkalyq boksshynyń basymdyǵy baıqalyp turdy. Gennadıı Golovkınge sýper orta salmaqqa aýysý ońaı bolmaǵandaı kórindi. Al Kanelo raýnd saıyn qarqynyn údetip, GGG-diń bir soqqysyna 2-3 soqqymen jaýap qaıtaryp otyrdy. Ol eńbegi esh ketpeı, ekinshi raýndtyń aıaǵynda qazaqstandyq boksshyǵa alǵashqy qaýipti soqqy darydy. Úshinshi raýndqa Golovkın shekesi qyzaryp shyqty.
Qazaqstandyq boksshy besinshi raýndta taǵy bir qaýipti soqqyny ótkizip aldy. Osylaısha tóreshiler Alvarestiń búkil raýndtarda basym kele jatqanyn tirkedi.
Aıqastyń 9 raýndyna deıin Gennadıı Golovkın asa bir belsendilik tanyta qoımady. Qarsylasynyń qulashtap urǵan soqqylarynan saqtanǵan tájirıbeli GGG alańda shyr aınalyp júrip judyryqtasýǵa májbúr boldy. Al «Kanelo» qazaqstandyqtyń shabýyldaryn bastalmaı jatyp toıtaryp, birinshi nómirmen áreket etti.
Toǵyzynshy raýndta Golovkınniń sol qolmen tik soqqan «djebi» meksıkalyqty teńseltip jibergendeı boldy. Gennadıı osy qarqynyn údetpek bolǵanymen, meksıkalyq tas-túıin qorǵanysqa kóship úlgerdi.
11,12-raýndtarda 32 jastaǵy «Kanelonyń» da sharshaı bastaǵany ańǵaryldy. Upaı sany boıynsha utylyp jatqandyqtan, GGG ár soqqysyna salmaq artyp, kezdesý taǵdyryn sheshetin joıqyn soqqy darytýǵa tyrysyp baqty. Sony sezgen Alvares aqyrǵy eki raýndta qasha júrip urys saldy.
12 raýndtyń sońǵy mınýtyndaǵy aıqas Golovkınniń kezdesý qorytyndysymen ishteı kelisetinin kórsetip turdy.
Tóreshiler de bul joly trılogııanyń túıinin kóp kúttirgen joq. Jeńis bir aýyzdan meksıkalyqtyń enshisine jazyldy. Gennadıı Golovkın oǵan bola kóńil kúıin túsirgen joq.
Al Alvares qarsylasyna alǵys aıtyp, izet bildirdi.
«Golovkın, bári úshin rahmet! Biz jankúıerlerge úsh ádemi aıqas syıladyq. Rahmet, dosym!», - dedi «Kanelo».
Kásipqoı mansabyndaǵy eń qaýipti qarsylasy Saýl Alvaresten ekinshi ret jeńilis tapqanyna, jasynyń 40-ta bol bolǵanyna qaramastan, Gennadıı Golovkın kásipqoı bokstan áli ketpeıtinin málimdedi.
«Árıne, meniń úlken josparlarym bar. Kózdep júrgen qarsylastarym kóp. «Kanelony» quttyqtaımyn jáne búkil boks jankúıerlerin quttyqtaımyn. Jigitter, esterińde bolsyn, meniń orta salmaqta úsh belbeýim bar. Meni áli oralamyn. Meni áli de bolsa chempıonmyn»,- dedi Golovkın.
Sýper orta salmaqtaǵy absolıýtti álem chempıony ataǵy úshin ótken shaıqasta joly bolmaǵan Golovkınge QR Prezıdenti Qasym-Jomart Toqaev telefon shalyp, qoldaý bildirdi.
Memleket basshysy Golovkınge Qazaqstandaǵy eń úzdik ulttyq chempıon ekenin aıtqan.
«Sen jankúıerler úshin álemdegi jáne elimizdegi eń úzdik ulttyq chempıon boldyń jáne chempıon bolyp qala beresiń. Biz seni maqtan tutamyz!» - dedi Prezıdent.
40 jastaǵy GGG men 32 jastaǵy Kanelonyń teketiresi osydan 5 jyl buryn bastalǵan-dy. Amerıka Qurama Shtattarynyń Las Vegas qalasyndaǵy «T-Mobile» arenada ótken jekpe-jek qazaqstandyq boksshynyń kásipqoı mansaptaǵy jeńissiz aıaqtalǵan alǵashqy aıqasy bolyp tirkeldi. Ádiletin aıtsaq, otandasymyz kásipqoı alańda jolyqtyrǵan eń qaýipti qarsylas ta osy Kanelo bolatyn. Buǵan deıin Gennadıı Golovkınniń komandasy onyń salmaǵyndaǵy talaı myqtyǵa usynys tastaǵanymen, ol talpynystardyń bári sóz júzinde qalǵan. Ásirese Gennadıı Golovkın naǵyz babynda bolǵan kezeńde promoýterlerdiń oǵan laıyqty qarsylas shaqyryp bere almaǵany barsha qazaqstandyqtyń esinde shyǵar.
2017 jylǵa deıin Golovkınniń komandasy meksıkalyq Saýl Alvareske de birneshe ret usynys tastaǵan. Qazirgi kúnniń bıiginen qarap, Kanelonyń komandasy qazaqstandyq boksshymen shyǵatyn eń ońtaıly sátti jyldar boıy yjdaǵatpen kútkenin senimmen aıtýǵa bolady. Ol ońtaıly sát 2017 jyly keldi. 35 jasqa deıin óziniń deńgeıindegi boks sheberleriniń eshbirimen qolǵap túıistirýdiń retin taba almaı, ózinen áldeqaıda osal qarsylastaryn qýyp júrip sabap úırenip qalǵan GGG-ge 27 jasynda jalyndap turǵan Saýl Alvares qatty qarsylyq kórsetti. Esesine bul kezge deıin Kanelo otandasy Gabrıel Martınes, Mıgel Vaskes, Sheın Moslı, Floıd Meıýezer, Erıslandı Lara, Mıgel Kotto, Ámir Han, kishi Chaves Hýlıo Sesar sııaqty óz dáýiriniń aty shýly sportshylarymen kezdesip úlgergen bolatyn. Al qazaqstandyqtyń kásipqoı mansaptaǵy statıstıkasynda atalǵan boksshylarmen shendese alatyn bir de bir qarsylas bolmaǵan. Muny bireýler qazaqstandyq boksshynyń atymen bıznes jasap júrgenderdiń strategııasy saýatsyz bolǵanynan kórse, biri Golovkınniń usynysyn qasaqana elemeı qoıǵan boksshylardyń qorqaqtyǵy dep baǵalady. Sol «qorqaqtardyń» ishinde Saýl Alvarestiń ózi de bar bolatyn. 2016 jyly tipti GGG-men qolǵap túıistirmeý úshin chempıondyq ataqtarynyń birinen bas tartqany eldiń esinde.
Foto: sports.kz