GGG arqyly jarnama jasaý maǵan kerek emes, meniń óz jankúıerim bar - Danııar Eleýsinov
Boksshynyń pikiri «Qazaqstan kásipqoı boks federatsııasynyń» VKontakte paraqshasynda jarııalandy.
«Sońyna deıin 8 maýsymda judyryqtasamyn dep oıladym. Qazaqstandyq jankúıerler úshin bul - óte jaqsy jańalyq, naǵyz mereke bolar edi. Bári de bir boks keshinde birneshe otandasymyzdy kórgisi kelgen bolatyn. Biraq aıaq astynan men aıqasatyn ýaqyt odan erterek qoıylyp ketti. Osyǵan baılanysty tezirek salmaq qýyp, qarsylasty aýystyrýǵa týra keldi. 8 maýsymda menimen shyǵýy tıis boksshy 25 mamyrda jekpe-jekke shyǵa almaıdy. Sondyqtan qysqa merzim ishinde jańasyn izdeýge týra keledi. Sparrıngterdi de burynyraq bastaýǵa májbúr boldyq», - deıdi Eleýsinov.
Degenmen, boksshy barlyq jaǵdaıǵa sabyrmen, salqynqandy qaraıtynyn jetkizdi.⠀
«Bolyp jatqan jaǵdaıdyń bárin jaqsylyqqa jorımyn. Men jeńiske jetemin. Árıne, belgilengen merzimnen eki apta buryn shyǵý - jaǵymsyz-aq. Keıbireýler meni GGG arqyly ataǵyn aspandatqysy keledi dep júrgen bolar. Shyn máninde bul maǵan qajet emes. Bul - naqty jaǵdaı. Meniń óz aýdıtorııam, jankúıerlerim, Qazaqstan halqym bar. Maǵan mundaı pıardyń keregi joq. Jaǵymsyz eshteńe aıtqym kelmeıdi. Bireýdi qaralaý oıymda bolǵan emes. Meniń oıymsha, Gennadıı bul isimen ózine jaqsylyq jasap otyrǵan joq. Oǵan sáttilik pen jeńis tileımin, sebebi ol - meniń otandasym. Meniń túsinýimshe, ol kezinde BAQ-qa bergen suhbatymnan alynǵan bir-eki aýyz sózge renjip qalǵan bolýy kerek. Biraq Nıý-Iorkte kezdesken kezimizde renishin maǵan tike aıtsa bolar edi ǵoı. Men renjimeımin. Bári jaqsy. 25 mamyrdaǵy aıqasqa daıyndalamyn», - deıdi Danııar Eleýsinov.
Eske sala ketsek, taıaýda Danııar Eleýsinovtiń Golovkınniń jekpe-jeginde óner kórsetpeıtini belgili bolǵan edi. Boksshynyń menedjeri Zııa Alıev Sports.kz-ke bergen suhbatynda Eleýsinovtiń 8 maýsymdaǵy Golovkın-Rolls anderkartyndaǵy jekpe-jegi belgisiz sebepterge baılanysty bolmaıtynyn jetkizgen.
Keıin bul máselege qatysty QR Kásipqoı boks federatsııasynyń vıtse-prezıdenti Vıktor Demıanenko pikir bildirip, Golovkın men Eleýsinov arasynda qandaı da bir túsinbeýshilik bar degenge senbeıtinin aıtqan bolatyn.