Geroındi ish kıimine jasyryp, satyp kelgen qostanaılyq ustaldy

QOSTANAI. QazAqparat — Jitiqara aýdanynyń polıtseıleri esirtki saýdasymen aınalysyp kelgen kúdiktilerdi ustady, dep habarlaıdy QazAqparat oblystyq polıtsııa departamentiniń baspasóz qyzmetine silteme jasap.

Polıtsııa bólimine túsken jedel aqparattan keıin qyzmetkerler izdestirý is-sharalaryn ótkizdi. Atalǵan fakt rastaldy. Jitiqara turǵynynyń páterinde esirtki zattary tabyldy.

«37 jastaǵy er adam ish kıimine geroınniń 17 túıinshegin folgamen orap jasyrǵan. Aýdandyq polıtsııa bóliminiń bastyǵy Bolat Imanovtyń aıtýynsha olar esirtkini satyp, 34 jastaǵy júkti áıeli ekeýi paıdalanǵan.

Aýdandyq sot kúdiktilerge qatysty «kúzetpen ustaý» bultartpaý sharasyn qabyldady»,-deıdi polıtsııanyń baspasóz hatshysy Irına Bejenar.

Qazir asa aýyr qylmys jasaǵan erli-zaıypty QR QK 297-baby, 3-bóliminiń 1-tarmaǵyna sáıkes sot aldynda jaýap beredi. Olardyń kinási dáleldense on jyldan on bes jylǵa deıin bas bostandyǵynan aıyrylady.