«Germanııanyń burynǵy ishki ister mınıstri Rahat Álıevti tutqynǵa alýdy talap etti» - BAQ-qa sholý

ASTANA. 22 aqpan. QazAqparat - «QazAqparat» agenttigi respýblıkalyq basylymdarda 22 aqpan, juma kúni shyqqan ózekti materıaldarǵa sholýdy usynady.

***

«Egemen Qazaqstan» gazetiniń jazýynsha, Germanııanyń burynǵy ishki ister mınıstri Otto Shılı óz otanynda eki bank qyzmetkerin urlap áketip, olardy azaptap óltirdi degen aıyp taǵylǵan Qazaqstannyń Avstrııadaǵy burynǵy elshisi Rahat Álıevti tutqynǵa alý úshin order berilýin talap etti. Qazir Venada turyp jatqan Germanııa Sotsıal-demokratııalyq partııasynyń múshesi Álıevke qatysty joǵarydaǵydaı sharanyń Frantsııada, Ulybrıtanııada nemese Germanııada qabyldanyp qoıylǵanyna senimdi. «Otto Shılı sondaı-aq óltirilgen menedjerler jesirleriniń múddesin qorǵaǵan venalyq advokat Gabrıel Lanskıdi qoldaıtynyn bildirdi. Shılı men Lanskı istiń tergelýi jáne prısıajnoılar soty taǵaıyndalýy barysynda Álıev pen onyń sybaılastaryn (olardyń birqatary qazir Avstrııada turyp jatyr) qamaýǵa alýdy talap etip otyr», - delingen «Germanııanyń burynǵy ishki ister mınıstri Rahat Álıevti tutqynǵa alýdy talap etti» degen taqyryppen berilgen maqalada.

«Arystyń sýymen nýlanyp jatqan Ordabasy aýdanyndaǵy jylyjaıda kókónis ósirýdiń qolǵa alynǵanyna úshinshi jylǵa aıaq basty. Aınalasy az ǵana ýaqyttyń ishinde jabyq orynda baptalǵan baqsha ónimderiniń dámin elimizdiń kóptegen qalalarynyń turǵyndary tatyp úlgerdi», - dep jazady «Egemen Qazaqstan» gazeti búgingi sanyndaǵy «Agrosektor aıshyqtary» degen taqyryptaǵy maqalasnyda. Basylymnyń atap ótýinshe, qys basy men erte kóktemniń qyzanaǵy men qııary berisi Almaty, Astana, Qaraǵandy, árisi Óskemen shaharlaryna jylyna eki ret turaqty túrde jóneltiledi. Byltyr Ordabasy aýdanynyń jylyjaılarynan respýblıkamyzdyń aımaqtaryna 100 tonnadan astam ónimder jiberilipti. Budan úsh jyl buryn birdi-ekili aýyldaǵy úılerdiń irgesin­de, onda da biren-saran jabdyq­tarmen qurastyrylǵan qondyr­ǵy­larda bastalǵan bul tirlik qazirgi kezde aýdannyń jaqsy atyn shyǵarǵan úlken kásipke aınalǵan.

***

Qysqy Azıada jáne EQYU sammıti kezinde altynmen aptalyp, kúmispen qaptalyp, qola tuǵyrǵa qondyrylǵan jeti altyn asyq «Asyǵyńyz alshysynan tússin» degen qazaqtyń qanatty sózderimen shekilip ǵalamsharǵa tarap ketken edi. Endi «EKSPO - 2017» kórmesi kezinde osy kádesyıymyzǵa oıylyp jazylǵan qanatty sózder qazaq jáne aǵylshyn tilderine aýdarylyp, shetelden kelgen qonaqtarǵa bas kádesyı retinde usynylmaq. bul jaıynda «Aıqyn» gazetiniń búgingi nómirinde jarııalanǵan «Qazaqtyń kádesyıy ǵalamdy tańǵaldyra ala ma?» degen taqyryptaǵy maqalada baıandalǵan. Basylymnyń atap ótýinshe, In­dýstrııa jáne ja­ńa tehnologııalar mınıstrliginiń bas­qarma bastyǵy Túgelbaı Bekbergenov týrızmdi damytý úshin qolóner, ónimder men sheberha­na­lar­dy qalaı uıymdastyrý kerek, sheberlerge qan­daı kómek jasaý kerek ekendigi pysyqtalyp, júıe­lik jo­balar jasalyp jatqanyn aıtqan. «Bizde kádesyı óndirisi endi ǵana qol­ǵa aly­nyp jatyr. Qozǵalys bar. As­ta­na sammıtiniń qonaqtaryn ózimizde jasal­ǵan kádesyımen qam­tamasyz ettik. Azıa­da kezinde de kádesyı ja­saýǵa otandyq qo­l­óner sheberleri qatystyryldy. Al EKSPO-nyń orny bólek. Biz EKSPO kezinde qol­óner, kádesyı sektorynda qol jetken bar­lyq jetistigimizdi kórsetemiz, bir-eki kompanııa­nyń ónimderimen shektelip qal­maımyz», - depti ol.

Osy basylymnyń jazýynsha, Qazaqstan fermerleri Memleket basshysynyń tapsyrmasymen qurylýy tıis Biryńǵaı astyq holdınginde óz ókilderimiz bolýy kerek dep sanaıdy. Olar qajet bolsa holdıng quramyndaǵy sheneýnikter men sharýalardyń úlesi teń bolýy tıis dep otyr. Fermerler bul talaptaryn Astanada ótken Qazaqstan fermerleriniń respýblıkalyq jıynynda aıtypty. Al bul usynys qalaı qabyldanary ázirge belgisiz. «Belgilisi, Biryńǵaı astyq holdıngine erikti túrde astyq óndirýshi kompanııalar, onyń ishinde ortasha jáne usaq aýyl sharýa­shylyǵy ónimderin óndirýshiler de kire alady. Aýyl sharýashylyǵy mınıstri Asyljan Mamytbekov te astyq holdıngi fermerlerdiń múddesin biriktiretin bolady dep sendirip otyr», - dep jazady basylym. Maqala «Astyq holdıngi kimniń múddesine qurylady?» degen taqyryppen berilgen.

***

«Til - ulttyń bitim-bolmysyn qalyptastyratyn basty qural. Jáne bala qaı ulttyń tilinde bilim alsa, sol ulttyń tilin, salt-dástúrin, ádet-ǵurpyn, mádenıetin boıyna sińirip ósedi. Sondyqtan qazaq balasy óz ana tilinde saýat ashyp, bilim alýy tıis», - dep jazady «Alash aınasy» gazetiniń tilshisi basylymnyń búgingi sanyndaǵy «Qazaq balasy nege óz elinde ózbek tilinde oqıdy?» degen taqyryppen berilgen maqalasynda. Avtordyń jazýynsha, Ońtústik Qazaqstan oblysynda ózbek ultynyń ókilderi kóptep turatyny belgili. Tipti eki-úsh qana qazaq otbasy qonystanǵan aýyldar da bar. Biraq bul qazaq balalarynyń ózge tilde bilim alýyna syltaý bola almaıdy. Qoldaǵy derekke súıensek, Ońtústik Qazaqstan oblysynyń Saıram aýdanyndaǵy segiz aýyldyq okrýgte 120 qazaqtyń qara domalaǵy ózbek tilinde oqyp júr.

Osy basylymnyń «Oı-kókpar» aıdarynda «Memlekettik grantpen bilim alǵan jas mamandardy joldama arqyly jumysqa ornalastyrý júıesin engizý múmkin be?» degen taqyryp tarazyǵa tartylǵan. «Oı-kókpar» suraǵyna ekonomıka ǵylymynyń doktory, professor, akademık, «Turan» ýnıversıtetiniń rektory, JOO qaýymdastyǵynyń prezıdenti Rahman Alshanov «Iıa» dep jaýap berse, «Joq» dep kásipker Azat Qonysbek óziniń ustanymyn bildiredi.