Germanııa Qazaqstanda jylyna 30 myń tonna qoı etin óńdeıtin zaýyt salýy múmkin

<p>ASTANA. KAZINFORM - Dúnıejúzilik &laquo;GFFA&raquo; azyq-túlik jáne aýyl sharýashylyǵy jónindegi forýmǵa qatysý úshin Germanııa astanasy Berlınge barǵan aýyl sharýashylyǵy vıtse-mınıstri Erbol Tasjýrekov bastaǵan qazaqstandyq delegatsııa &laquo;Jasyl apta&raquo; kórmesiniń resmı ashylýyna qatysty.</p>

Bul týraly QR Aýyl sharýashylyǵy mınıstrliginiń baspasóz qyzmetinen málim boldy.

- 2024 jylǵy halyqaralyq «Jasyl aptanyń» aýqymdy iskerlik baǵdarlamasy jetekshi óndirýshilerdiń ozyq tásilderimen jáne jetistikterimen tanysýǵa jáne búkil álemniń aýyl sharýashylyǵy salasynyń kóshbasshylarymen baılanys ornatýǵa tamasha múmkindik beredi, - dep atap ótti Erbol Tasjúrekov nemis jáne qazaqstandyq jýrnalısterge bergen suhbatynda.

Foto: QR AShM baspasóz qyzmeti

Qazaqstan alǵash ret 2018 jyly «Jasyl aptada» óziniń pavılonyn ashyp, 10 otandyq aýyl sharýashylyǵy ónimin óndirýshilerdiń ónimin álemge tanystyrdy. Bıyl kórmege 20-dan astam qazaqstandyq kompanııa qatysýda. Ekspozıtsııada et ónimderi, bıe men túıeniń qurǵaq súti, un, ósimdik maılary, kondıterlik ónimder, bal, jent, jemis shyryndary bar.

Foto: QR AShM baspasóz qyzmeti

Germanııa - Qazaqstannyń, ásirese ekonomıka men aýyl sharýashylyǵy salasyndaǵy mańyzdy seriktesi. 2023 jyldyń qańtar-qarasha aılarynda eki el arasyndaǵy aýyl sharýashylyǵy ónimderiniń taýar aınalymy 113,7 mln​​dollardy qurady. Bul 2022 jyldyń sáıkes kezeńinen 18,3%-ǵa artyq. Osy ýaqyt ishinde Qazaqstannan Germanııaǵa 26,2 mıllıon AQSh dollardyń aýyl sharýashylyǵy taýarlary eksporttaldy. Sonymen qatar, negizgi jetkizilim balyq fılesi men basqa da balyq ónimderi bolyp keledi (16,9 mln. AQSh dollary; 2,2 myń tonna). Qazaqstan óz kezeginde Germanııadan tek shokolad jáne quramynda kakao bar basqa da daıyn ónimderdi 24 mıllıon AQSh dollarǵa ımporttady (2023 jyldyń qańtar-qarasha aılarynda Germanııadan Qazaqstanǵa jalpy ımport 87,5 mıllıon AQSh dollardy qurady).

Foto: QR AShM baspasóz qyzmeti

Erbol Tasjýrekovtyń aıtýynsha, germanııalyq ınvestorlardyń qatysýymen CLAAS jáne HORSCH kompanııalarynyń aýyl sharýashylyǵy tehnıkalaryn qurastyrý jobasy iske asyrylǵan. Qazirgi ýaqytta Baumann GmbH kompanııasynyń qýaty jylyna 30 myń tonna qoı etin óńdeıtin zaýyt salý týraly kelissózder júrgizilýde.

Foto: QR AShM baspasóz qyzmeti

 

- Germanııadaǵy dúken sórelerindegi otandyq taýarlardyń assortımenti jyl saıyn keńeıe túsetinine senimdimin. Qazaqstannyń bul kórmege qatysýy dástúrge aınaldy jáne iskerlik baılanystar ornatýǵa, tájirıbe almasýǵa jańa birlesken jobalardy iske asyrýǵa yqpal etetin mańyzdy oqıǵa bolyp tabylady, - dep atap ótti vıtse-mınıstr suhbat barysynda.