Germanııadaǵy sý tasqyny: Apat eldiń shyǵysyna qaýip tóndirýde

GERMANIıA. QazAqparat – Germanııanyń batysyndaǵy sý tasqyny apaty qurbandarynyń sany 140 adamnan asty. Býndesver qatysyp jatqan izdeý-qutqarý jumystary munymen toqtap qalmaıdy, dep habarlaıdy QazAqparat Euronews-ke silteme jasap.

Habar-osharsyz ketkender júzdegen adamnan asty. Alaıda bılik bul sandar únemi jańaryp otyratynyn basa aıtady, óıtkeni kóptegen eldi mekender men tutas aımaqtar baılanyssyz jáne jaryqsyz qaldy. Ózenderde ornalasqan birneshe sý elektr stansasy jumysyn birden toqtatty, al jóndeý uzaq ýaqytqa sozylady.

Qazir sý deńgeıi birtindep tómendep kele jatyr, jergilikti turǵyndar úıindilerdi tazalaı bastady.

Jeksenbi kúni kantsler Angela Merkel Reınland-Pfaltske barýdy josparlap otyr. Bul aımaq basqalarǵa qaraǵanda qatty zardap shekken, onda júzge jýyq adam ólgen.

Sonymen qatar, sý tasqyny Germanııanyń shyǵysyna qaraı yǵysty, sarapshylardyń pikirinshe, bul este qalatyn sý tasqyny bolýy múmkin. Tótenshe jaǵdaı rejımi Bavarııanyń ońtústik-shyǵysynda engizildi. Onda birqatar aımaqta turǵyndarǵa tómengi qabattarǵa túspeýge jáne kóshege shyqpaý kerektigi eskertildi. Saksonııanyń shyǵysynda da qatty nóser jaýdy.