Germanııadaǵy «Dala qyrany-2014» oqý-jattyǵýyna «Qazbattyń» 150 áskerı qyzmetshisi qatysýda (FOTO)

ASTANA. QazAqparat - Búgin «Dala qyrany-2014» taktıkalyq-arnaıy bitimgershilik oqý-jattyǵýynyń belsendi kezeńi bastaldy, dep habarlady QR Qorǵanys mınıstrliginiń baspasóz qyzmetinen.

Germanııada ótip jatqan oqý-jattyǵýǵa Kazaqstannan podpolkovnık Baqytjan Jetpisov bastaǵan bitimgershilik batalon shtaby jáne kapıtan Aıan Nurqasov bastaǵan «Qazbattyń» kúsheıtilgen rotasy quramyndaǵy 150 áskerı qyzmetshi qatysýda.

«Dala qyrany-2014» oqý-jattyǵýynyń basty maqsaty bitimgershilik bólimsheleriniń NATO-ǵa qatysýshy elder áskerı kontıngentterimen úılesimdiligi men ózara is-qımylyn pysyqtaý bolyp tabylady.

Kópultty kontıngenttiń quramyndaǵy qazaqstandyq bitimgershilik batalon kópultty ortadaǵy úılesimdilikti jaqsartý, mıssııalardy josparlaý, jedel buıryqtardy oryndaý, aǵymdaǵy operatsııalardy qadaǵalaý jónindegi mindetterdi pysyqtaýda.

Bıyl «Dala qyrany» on ekinshi ret ótýde. Bul bitimgershilik oqý-jattyǵýy tuńǵysh ret 2003 jyly QR QK Aeroutqyr áskerleriniń «Іle» oqý-jattyǵý ortalyǵynda ótkizilgen bolatyn.

«Dala qyrany-2014» oqý-jattyǵýyna Tájikstan, Qyrǵyzstan, AQSh, Germanııa men Ulybrıtanııa qatysýda.