Germanııada tórt aptalyq lokdaýn bastaldy

BERLIN. QazAqparat – Germanııada koronavırýstyń taralýyn báseńdetýge baǵyttalǵan tórt aptalyq ishinara (jartylaı) lokdaýn bastaldy, dep habarlaıdy QazAqparat dw.com resýrsyna silteme jasap.

Ýaqyt shekteýleri barlyq federaldyq aýmaqtarda kúshine enedi. «Jumsaq lokdaýn» barlyq demalý oryndaryn, meıramhanalardy, kafelerdi jáne qyzmet kórsetý salasyndaǵy kóptegen kompanııalardy jabýdy kózdeıdi.

Sonymen qatar azamattarǵa óz úı sharýashylyǵynan tys áleýmettik baılanystardy «absolıýtti mınımýmǵa deıin» shekteýge nusqaý berildi.

Robert Koh atyndaǵy ınstıtýttyń (RKI) málimetinshe, Germanııada ótken táýlikte 12 097 adam koronavırýsqa shaldyqqan. Aýrý juqtyrǵandardyń jalpy sany 545 027 adamǵa jetti.

Germanııada ınfektsııa paıda bolǵannan beri COVID-19 vırýsynan 10 530 adam qaıtys bolǵan (táýliktik ósim 49).