Germanııada koronavırýspen kúres sharalary kúsheıtiledi

BRıÝSSELЬ. QazAqparat – Eýropa elderiniń kópshiliginde COVID-19 juqtyrý jıiligi artyp keledi. Koronavırýstyń yqtımal kúzgi tolqyny aldynda Germanııa taǵy da halyqty belgili bir jaǵdaılarda FFP2 maskalaryn taǵýǵa mindetteıdi, dep habarlaıdy QazAqparat menshikti tilshisi.

Elde kún raıynyń sýytýyna baılanysty aýrýǵa shaldyǵýshylar sanynyń turaqty ósimi baıqalǵandyqtan, sanıtarlyq erejeler qaıta engiziledi. Juma kúni COVID-19 juqtyrýdyń 96 myń 367 jańa jaǵdaıy tirkeldi. Bul bir apta buryn tirkelgen jaǵdaılardan eki ese kóp.

GFR densaýlyq saqtaý mınıstri Karl Laýterbah 1 qazannan keıin engizgen jańa erejelerdi basqa eýropalyq eldermen salystyrǵanda qatańyraq ekenin atap ótti.

Senbiden bastap qalaaralyq poıyzdardyń 14 jastan asqan jolaýshylary osy ýaqytqa deıin mindetti bolyp kelgen hırýrgııalyq maskalardyń ornyna FFP2 maskalaryn taǵýǵa mindettelmek.

Germanııanyń barlyq 16 jeriniń densaýlyq saqtaý mınıstrleri jergilikti avtobýstar men poıyzdardyń jolaýshylary kem degende hırýrgııalyq maska taǵýy kerek dep kelisti, degenmen bul jańa federaldy erejelerge sáıkes mindetti emes.

Ekinshi jaǵynan, áýe jolaýshylary ázirge maskasyz júre alady, bul EO-nyń basqa elderi men áýe kompanııalarynyń tájirıbesine sáıkes keledi.

FFP2 maskalaryn endi nemis aýrýhanalarynda, qarttar úıinde jáne dárigerlerdiń kabınetterinde taǵý qajet. Qarttar úıine nemese aýrýhanaǵa barar aldynda teris nátıjesi bar koronavırýsqa tapsyrylǵan test kórsetý kerek, al osy mekemelerdiń qyzmetkerleri aptasyna birneshe ret testileýden ótýi tıis.

Eger COVID-19 –ǵa baılanysty epıdemıologııalyq ahýal nasharlasa, federaldy jerler dúkender men meıramhanalar sekildi jabyq jerlerde maska taǵýdy talap etý sııaqty qosymsha sharalardy qoldanýǵa quqyly. Testiler mektepter men balabaqshalarda da mindetti bolýy múmkin.

Orta oqý oryndarynda GFR-diń aımaqtyq bıligi tek 11 jastan asqan balalar úshin maska taǵýdy mindetteýdi qaıta engize alady.