Germanııada koronavırýs juqtyrǵandar sany ósti

BRıÝSSELЬ-BERLIN. QazAqparat – Germanııanyń Densaýlyq saqtaý mınıstri Karl Laýterbah osy aptada epıdemıologııalyq ahýaldyń qatty nasharlaǵanyn málimdedi, dep habarlaıdy QazAqparattyń menshikti tilshisi.

«Elde koronavırýs boıynsha kórsetkishter kúrt ósti. Omıkron shtamynyń jeńil nusqa ekeni tolyǵymen shyndyq emes», - dedi K. Laýterbah brıfıngte baspasóz quraldaryna.

Germanııada beısenbi kúni táýligine koronavırýs juqtyrýdyń rekordtyq kórsetkishi tirkeldi, dál sondaı kórsetkish – 252 836 jaǵdaı 11 naýryz kúni de tirkelgen.

Sarapshylardyń aıtýynsha, vırýs juqtyrý jaǵdaılary shyn máninde odan da kóp bolýy múmkin. Sebebi qazirgi kezde synaq ortalyqtarynyń múmkindikteri shekteýli bolyp otyr.

Alaıda Germanııa osy jyldyń 20 naýryzynan bastap koronavırýs boıynsha shekteýlerdiń birazyn alyp tastaýdy josparlap otyr.

Alysqa jol júretin poıyzdar men ushaqtarda maska taǵý mindetti bolyp qalady.