Germanııada qolaısyz aýa raıynan júzdegen reıs ushpaı qaldy

<p>BERLIN. KAZINFORM &ndash; Eldiń meteorologııa qyzmeti Germanııanyń birqatar amaǵynda tolassyz jańbyr men qar jaýatynyn eskertti. Maındaǵy Frankfýrt jáne Mıýnhen áýejaılary júzdegen reısti toqtatty, dep habarlaıdy <a href="https://www.dw.com/ru/sotni-aviarejsov-otmeneny-v-germanii-izza-nepogody/a-68010322" target="_blank" rel="noopener">DW</a> aqparat agenttigi.&nbsp;&nbsp;</p>

Germanııanyń batysy men ońtústiginde aıazdy jańbyr men qalyń qar jaýǵan aýa raıynyń kúrt nasharlaýyna baılanysty Maındaǵy Frankfýrt pen Mıýnhen áýejaılary sársenbi, 17 qańtarda júzdegen reısti keıinge shegerdi.

Osylaısha, Frankfýrtte josparlanǵan 1047 reıstiń 570-i toqtatyldy.

Fraport basqarýshy kompanııasy toqtatylǵan reıs jolaýshylarynan áýejaıǵa kelmeýin surady.

Mıýnhende 650 reıstiń 250-i toqtatyldy. Tehnıkalyq qyzmet táýliktiń birinshi jartysynda eki ushý-qoný jolaǵynyń bireýin muz jamylǵysynyń paıda bolýyna jol bermeý úshin úzdiksiz óńdedi.

Baden-Vıýrtemberg federaldy jerinde polıtsııa Rashtatt, Baden-Baden qalalarynda, sondaı-aq A5 avtobanynda kóptegen jol-kólik oqıǵalary men keptelis bolǵanyn habarlady.

Frantsýz shekarasyna jaqyn ornalasqan Saarbrıýkkende turǵyndar kún raıynyń áserin tańerteń sezdi: aıazdy jańbyrdan qala ortalyǵynda jaıaý júrginshiler men kólikter júre almaı qalǵan.

Deutsche Bahn temirjol kompanııasy sársenbi kúni tańerteń Maındaǵy Frankfýrt pen Keln arasyndaǵy júrdek poıyz qatynasyndaǵy alǵashqy úzilister týraly habarlady.

Kompanııa sondaı-aq júrdek poıyzdar jyldamdyǵyn 200 km/saǵ deıin tómendetýge buıryq berdi jáne aımaqtyq jáne qalaaralyq poıyzdardyń keshigýi men múmkin toqtatylýy týraly eskertti.

El bıligi turǵyndardy kólikpen jolǵa shyqpaýǵa jáne múmkindiginshe úıde qalýǵa shaqyrdy. Kóptegen aımaqtarda mekteptegi sabaq ta toqtatylǵan.