Germanııada bilimin jetildirip júrgen qazaqstandyq 8 magıstrant oqýdan shyǵaryldy
Germanııada bilimin jetildirip júrgen Sot tóreligi akademııasy «Quqyqtaný» mamandyǵynyń 8 magıstranty oqýdan shyǵyp qana qoımaı, memleket tólegen shyǵyndary men shetelde taǵlymdamadan ótýine jumsalǵan qarjyny qaıtaratyn boldy.
Akademııa rektory Záýresh Baımoldına qol qoıǵan buıryqqa sáıkes, atalǵan magıstranttar «jalpy qabyldanǵan moraldyq-etıkalyq normalardy saqtamaǵany» jáne «óz is-áreketimen jáne qylyǵymen qoǵam tarapynan synǵa jol berip, basqa memlekettik qyzmetshiler tarapynan qyzmettik ádep normalaryn buzýdyń jolyn kesý jáne olardy boldyrmaý jóninde shara qabyldamaǵany» úshin oqýdan qýylyp otyr.
Eske sala keteıik, 13 qańtarda jelide shetelde taǵlymdamadan ótken qazaqstandyq magıstranttarǵa qatysty vıdeo jarııalanǵan bolatyn.
QR Joǵarǵy soty janyndaǵy Sot tóreligi akademııasynda atalǵan magıstranttarǵa qatysty vıdeomaterıaldy zertteý men tekserý boıynsha komıssııa qurylǵan bolatyn.
«Tártip buzýshylarǵa tártiptik jaza qoldaný týraly máseleni sheshýge tekseris qorytyndysy boıynsha jasalǵan komıssııa usynystary negiz bolady. Akademııa magıstranttarynyń tártip buzýshylyǵy rastalǵan jáne olardy oqýdan shyǵarý týraly sheshim qabyldanǵan jaǵdaıda olardan oqý úshin memleket tarapynan jumsalǵan barlyq qarajat, osy sheteldegi taǵlymdamamen baılanysty bıýdjettik shyǵyndar óteledi» delingen baspasóz baıanynda.